| 日期 | 全年適用 |
約咗朋友喺大本型食晚飯，見仲有時間咪同小小豬去行下商場，點知一行之下…..就變成一個小小豬開心大放電嘅活動啦！
其實初時我哋都係本著八卦心態，想睇下小小豬平日最鍾意玩嗰個森林遊戲會變咗做咩新遊戲。一入到去就發覺唔得掂，因為搖身一變成為一個都幾大嘅彈跳迷宮，小小豬望到對眼都好似發青光咁，最後係時間許可下，就同佢入去玩一轉啦~
雖然係轉咗新迷宮，但個價錢都好似係同以前差唔多(嗱…對錢銀心水清嘅小小豬話，我自己都唔記得之前俾幾多錢啦)~
一入到場小小豬就已經一支箭咁衝去玩，有咩新嘅都唔理，最緊要係有得玩，佢有佢玩就等我嚟八卦下啦。
依個新場就主要分為三個部分，先有糖果城(即係大型波波池)~
中間就有一個彩色繩網~
仲有一個大迷宮~
仲有一個兒童GOLF場~
小小豬首先就去玩咗依個彩色繩網，佢一望見就諗起暑假喺北海道玩過，仲話好掛住添(阿仔….我又何嘗唔掛住呢..哈哈哈)。亦都係因為佢鍾意，所以佢成日都走入繩網爬來爬去~
