| 日期 | 全年適用 |
台北，我相信已經有唔少香港人去過，
亦係一個去短途旅行唔錯嘅地方。
之但係我同小JM爸就有啲唔同，我地比較喜歡台中。
喜歡台中嘅人和事，更喜歡台中「慢一點」嘅生活節奏！
台中，我同小JM爸已經來過N次，
每次都會去探朋友，
每次都會找相熟嘅司機接載，
每次都會去不同嘅景點或地方探索。
小JM出世之後我哋亦照舊每年到訪台中，
除了探朋友，就係要放鬆一下。
再者，台灣亦係一個母乳友善嘅城市，
所以當小JM仲係細B嗰陣都一樣無有怕。
最近去完台中返港，
發現台中機場剛剛翻新咗「哺集乳室」，
比之前更靚，更加舒適。
所以小JM媽都忍唔住要出文讚一下。
（五月嗰陣去都未裝修架！）
裝修之後一開門就見到一隻好靚嘅木馬裝飾，
房間顏色都以粉色為主調，營造出柔和而溫馨嘅感覺，
係房內換片、餵奶亦十分舒適。
（小JM對木馬似乎有啲興趣咁喎，不過真係唔好意思，係唔騎得架！）
房內更提供咗四款不同大小嘅尿片以供BB們不時之用，
而小JM已經著緊尿片褲，所以我哋無用到。
除咗尿片外，房內亦有提供到乳墊俾母乳媽媽，
另外仲有洗奶樽用嘅洗樽液，及BB用嘅保濕乳液添！
貼心程度真係爆燈架！
你以為就係咁簡單？
係換片墊另一邊仲有埋濕紙巾，而且仲放咗係濕紙巾保濕器入面添架！
除咗以上幾樣設施之外，
房內其實仲設有一座大型水機，有熱水提供，
方便俾小B沖奶粉之用添架！
台中機場嘅呢個哺集乳室真係唔會比日本嘅輸蝕架！