上次講到我哋買左1-Day Pass去海遊館，仲有門劵優惠！
今次我哋就介紹埋係海遊館隔離的「 Legoland Discovery Centre」！
我哋帶小JM去左海遊館睇最巨大既鯨鯊，
睇完仲去左體驗館度親親小魟魚同鯊魚！
玩完一輪就緊係要去醫肚啦，
所以我地就去左係海遊館隔離嘅 Shopping Mall，
食飽之後就緊係去Legoland Discovery Centre放下電啦！
亦因為有Day Pass嘅 關係，我哋去Legoland係「免費」！
而且今日入館仲唔駛排隊，一入即時有得玩！
不如你都一齊睇下有幾好玩，
到時去到大阪又多個放電好去處啦嘛！
大阪Legoland Discovery Centre 小簡介：
係一間以Lego積木為主題既室內遊玩樂園。
於Legoland內設有多個不同遊戲館，
有機動遊戲、Playzone、燈光展館、4D電影等遊樂設施，
可以俾小朋友們盡情探索及體驗。
Legoland Discovery Centre資料：
地址： 港區海岸通1-1-10
營業時間： 10:00～19:00或20:00 (營業結束前2個小時停止入場)
入場收費： 2,300YEN
＊必須有小朋友同行方可入場＊
如果沒有買Day Pass的話，可以於網上預訂入場劵喔。
好啦，一齊出發去Legoland Discovery Centre放電啦！
一入到去小JM已經急不及待想去玩Lego啦！
喺門口售票處位置側邊有一幅Lego人型嘅 Lego牆，
可以俾小朋友爸爸媽媽喺排緊隊買飛個陣玩住等！
當日售票處嘅哥哥見到小JM就大叫「卡哇兒」，
之後衝咗去係小JM隔離諗住撩小JM玩，
點知小JM就俾哥哥嚇到呆咗，唔識俾反應～XD
可能因為今日落大雨又臨近打風，
今日嘅人流唔算好多，
唔需要排隊就已經可以即時換到入場劵啦。
臨入場前我地仲買左本Collector 小冊子，
係用來收集場內相關既印仔，
哥哥仲送左張Lego貼紙俾小JM添。
一入場就已經可以收集到第一個印仔架啦，
哥哥好細心咁同爸爸一齊教小JM點蓋印。
印完之後就可以一家人一齊影返相大合照，
有興趣購買相片嘅話就可以臨走前買走喔。
影完相之後我哋將會去到一個遊戲世界，
入面好似打機咁，好啱大人同小朋友一齊玩，
仲可以組合出自己鍾意既Lego人做角色添。
不過好可惜，呢個展館內係唔俾影相，
所以我哋都好乖乖咁玩完正式入場館放電。
進入場館最先會見到一個放置BB車嘅位置，
爸媽們可以將BB車泊好，再同小B一齊去玩，
咁就自然輕輕好多啦！
好囉！一齊睇下有咩玩啦！
一入門口右手邊已經有兩個不同遊戲館可以俾大家熱熱身！
你會先先見到一個以恐龍為主題嘅Logo館。
恐龍Lego館
館嘅中央有一個好大既Lego恐龍場景台，
可以俾大人同小朋友一齊砌Lego！
館入面每個各落都有大大小小嘅恐龍Lego擺設，
仲有恐龍蛋添，全部都係由Lego砌成！真係好犀利呀！
恐龍館隔離會有一個機動射擊既遊戲館。
就好似廸廸尼咁，坐係火車卡再用槍射擊目標，
之後就緊係鬥高分啦！
不過呢個館係唔俾影相架，有幾位工作人員係度睇住嘅，
所以大家就唯有幻想下個館係咩樣係啦。
（圖中左下角張相就係館既排隊通道影啦！XD）
熱完身就緊係要進入主場館睇下入面有咩玩啦。
一望過去，你就會見到一雙用Lego砌既飛龍模型，
又可以打下卡，影下相啦。
而圖中右上角既其實就係 4D館。
4D館門外會有呢位Lego叔叔「把關」！
想睇4DMovie？無問題，只要跟返放映時間到來4D館就可以免費入場！
館門外仲會有姐姐派 4D眼鏡俾大家添！
係4DMovie 播放嘅時候仲會有特別效果出現。
你可能會濕下身，場景又會出下煙咁，你都有小B來感受一下啦！
如果4D館未夠鐘放映唔緊要，
可以去左 MINILand 玩陣，睇下啲Lego模型先都得！
MINILAND
MiniLand入面既場景係呈現左大阪既一啲特色景點，
每一個景點都好吸引，做得好仔細！
你以為就咁望下模型就算？點止咁簡單！
MiniLand仲可以呈現出大阪日與夜兩種場景架，
夜晚仲可以睇到煙火添加！
你留心啲睇下！！！！
橋度嘅係～哥。斯。拉～呀！！！
無錯，你無睇錯，
只要你按一按模型前方既按鈕，
哥斯拉就會被你召喚出來架啦！
除左哥斯拉，你仲可以來返個「二人摔角時間」，
平時打架媽媽就會唔高興，咁就唯有同爸爸「打」摔角係啦！
再唔係打個全壘打都仲得！
全場即時為你歡呼！
咦，原來爸爸同小情人係河畔睇緊鴨仔先真。
動態嘅玩完不如又介紹下啲極級放電玩意啦！
就係新奇刺激既機動遊戲啦！
Lego巫師將會用魔法帶你飛，仲唔快啲捉實！
而另一邊仲會有一個大既Playhouse，
入面仲有滑梯同出奇地咁多既大積木㗎！
不過可惜小JM仲未夠高玩呢兩樣嘢，所以只可以轉戰到下一個遊戲室係啦。
而圖中你見到有幾座Lego大廈林立既枱面其實係有特別機關，
小朋友只要慢慢將積木砌好，再開動枱上嘅震動裝置，
就會知道自己砌嘅「屋」夠唔夠堅固啦！
唔夠堅固分分鐘會被震散，
所以都好考小朋友嘅定力！
另外館內有個位係俾小朋友砌車仔嘅，
可以同其他小朋友一齊各自砌部戰車出來，再一齊鬥快㗎！
小JM就未識玩，所以只係同左Lego賽車人影相就算了。
除左有男仔鐘意既遊戲室之外，
館內仲有一間Lego屋，岩晒女仔玩㗎。
有花園啦、廚房啦、客廳啦咁，
真係五臟俱全㗎！
係Lego屋門前仲有得寄明信片添㗎。
而屋既隔離就係一個「樂園」，一個Lego遊樂場呀！
你睇，仲有牛牛呀！
係咪好得意呢？
唔單止咁，係館中心仲有一個Lego大笨鐘呀！
真係識郁㗎，唔係假野來㗎。
除左大笨鐘之外，原來連餐廳都係用Lego砌成㗎！
真係好夢幻呀！
就連餐廳附近既活動室都係滿滿既Lego！
仲有Lego機械人呀！
LegoLand唔單止帶俾小朋友歡樂，
連爸爸媽媽去到都一樣玩得好開心，
可以話係輕鬆又愉快嘅放電之旅呀！
相關文章：
