| 日期 | 全年適用 |
香港寸金尺土，好多餐廳其實都只係得小量玩意俾小朋友玩就稱自己為親子餐廳，唔係朋友介紹都唔知香港竟然有一間咁大間，咁多野玩既親子餐廳，當中最吸引小朋友都係呢幾個吹氣滑梯，夏天差不多完，涼涼地未必去到海灘? 但呢度有個吹氣滑梯會變身成水池，小朋友由成層樓高的滑梯滑落嚟，都幾刺激架，不過如果想玩記得帶泳衣同毛巾啦。
如果唔想濕身，除咗最高那個吹氣滑梯，其他設施都足以令小朋友玩到(或熱到)變濕水鴨，好似呢個彈彈牀好多小朋友都玩到癲晒。
餐廳位於科學園，入到去成個環境都好清靜，而整個餐廳都被池畔包圍，風景真係好靚。
餐廳大部分地方都用咗落地玻璃，光線非常充足，成個感覺好舒服。
最重要係大人可以喺餐廳嘆住冷氣用餐，小朋友自己喺出面玩都可以睇得清清楚楚。餐廳內所有玩樂設施全部都係免費提供俾食客，基本上一進入餐廳﹐職員就會為小朋友帶上手帶，小朋友可以無限次任玩所有遊樂設施。
除左吹水彈牀同滑梯，仲有好幾款遊樂設施，小朋友上上落落不停消耗體力。
小周董來來回回自己爬上爬落，玩咗至少10次都唔厭~ 哈
香港地唔係好多公園有得玩鞦韆，呢度有3個鞦韆俾小朋友任玩，仲可以望住個湖玩，真係寧捨玩得開心，連我都好想玩埋一份呢。
如果同細DD嘅小朋友來玩，亦有相對短D的滑梯可以玩，同埋可以坐下呢架飛機影下相， 都好靚呢 ^^
仲有好多架不同款式既車仔俾小朋友周圍玩。
小朋友特別鍾意玩水，呢個小水池玩具都好受小朋友歡迎呢。
玩到熱晒+濕晒，返餐廳食嘢之餘，餐廳入面亦都有大量遊戲俾小朋友玩。
除咗可以坐船扮海盜、亦可以玩煮飯仔扮下廚師。
仲有大量圖書同小玩具提供俾小朋友。成間餐廳基本上都係為小朋友而設，但最可惜係WEEKEND佢無KIDS MENU提供，而且食物都屬於較高價格，如果以大人計每位$3-400應該都走唔甩了，但食物質素我覺得都好味，唔會令我哋失望，加上我哋由12PM坐到5:30PM….哈哈，坐足差不多6個鐘都無俾人趕的感覺， 所以我覺得都值得推介俾大家呢！
食完玩完，可以順便參觀下科學園，個度有好多活動係教導小朋友一D科學知識，同埋一家人可以周圍影下相留念，開開心心又過咗一個愉快的周末啦，WEEKEND FAMILY DAY大家都可以搵一日去呢度體驗下啦 ！
Meraviglia Bar e Ristorante
沙田白石角香港科學園第二期科技大道西10號浚湖樓地下S041號舖
作者：小周董世界
