【帶著小B去旅行】日本福岡由布院 山莊 四季庵（溫泉旅館）
呢轉日本福岡之旅除左係小JM第一個既溫泉體驗之旅，
仲係爸爸媽媽既Relax之旅！
雖然帶著小B係會忙碌一啲，
但一家三口一齊去溫泉嘆下又的確係一件賞心樂事！
既然係自駕遊，
咁就緊係去遠少少都唔緊要啦，
所以今次就去 －由。布。院！
為左今次既重點環節 － 溫泉，
媽媽我已經不停做功課，
務求搵到一間又舒服又正斗既溫泉旅館！
終於皇天不負有心媽，
俾我搵到一間位於福岡由布院既古式溫泉旅館 －山莊 四季庵！
地址： 〒879-5101 大分県由布市湯布院町塚原字黒笠木135-7
（下午三點先可以Check-In 架，記得啦！）
旅館設有停車場，方便自駕遊（但最好事前都同旅館講聲，以免唔夠車位喔！）
至於唔係自駕既旅客，
可以係湯布院駅搭15分鐘車程 或湯布院IC搭25分鐘車程 就到架啦！
因為係我訂呢間溫泉旅館個陣唔見到有代理網站，
所以媽媽我就只好自為之嘗試係溫泉旅館既日文網站訂房係啦！
係日文網訂房話易唔易，但又唔算好難，
摸左一陣，再加埋Google Translate軟件即時攪掂！
預約房間小教學：
一入到 山莊 四季庵既主網站就會即時見到有預約表單！
參考資料：
根據指示輸入資料就會見到吉房架啦。
（建議以房間類型來選擇，因為可以睇埋房既資料）
睇左一輸，結果我地揀左一個大既和室，仲包左內風呂添！
因為帶著小B，所以今次無揀到室外既露天風呂，
怕天氣太凍小B一陣冷親就唔好啦嘛！
