| 日期 | 全年適用 |
區區都有好多不同放電地方，九龍灣就有一個地方$85可以全日任玩，無錯…係任玩!! 你可以一早去玩完，出去食完飯入返去再玩，住附近的話返屋企瞓番個晏覺，夜晚又去玩過都仲得。呢度就係九龍灣德寶商場內的MABALAND，場地唔算非常之大, 但我覺得麻雀雖小，五臟俱全啊， 加上其實佢都係上年頭先開業, 好多設備同玩具都仲好新淨。
去MABALAND其實都好容易, 九龍灣MTR出大約行10分鐘左右就到, 駕車人士商場己經設有停車場, 一去到門口已經見到一大個波波池, 波波~波波~全部都係波!!!!!小朋友第1時間當然表演下滾波地啦! 哈~ 好HIGH(好開心)啊!!! ^^
由滑梯滑下係小朋友同大人玩得最開心嘅地方。
一滑下即刻投入波波池的懷抱, 好開心呢!!!
全場都有軟墊絕對唔擔心小朋友會撞親, 但太多波波嘅關係, 我反而擔心一D細BB潛入咗波波池入面, 被我唔小心踢到~ 哈哈
除咗波波池, MABALAND仲有障礙遊戲, 爬高爬底小朋友就最高興。
有2層的攀爬區….小朋友走過呢條橋好容易, 但我要跟尾實在好攰。
嘩~阿仔!!! 阿媽條腰斷啦!!!!
全場唯一一個千秋0係一個好神秘嘅地方….想玩就要自己努力搵搵啦!! ^^
係囉~玩下射波波咪幾好囉!!!! ((阿媽終於可以坐喺隔離唞唞 ^^”))
呢條繩網橋小周董試咗幾次都唔敢行到最尾~ 哈! 下次再挑戰, 如果有小BB去玩, 場內都有幾架THOMAS車俾小小朋友仔慢慢行。
當我以為小周董在波波池同繩網區玩咗2個鐘應該差不多無電嘅時候, 但佢一入到呢個超級吹氣彈牀, 依然可以來回跑幾十次, 我就知原來小朋友D精力真係用不盡呢!!
場內仲有一D大型玩具俾小朋友玩, 女仔就有煮飯仔, 男仔就玩火車啦!!
真係有幾張枱咁大架~ 好靚!!
仲有超級LEGO可以砌…..有小朋友砌到好高好高, 仲高過小周董成個人, 好厲害啊!!!
小周董都好鍾意砌超級LEGO, 靜靜玩足20分鐘, 我又可以唞唞, 太好~哈!
其實場地真係算幾乾淨, 連換片地方都好整齊清潔, 所有大小朋友出入場地都要消毒同量體溫。
星期一至四 全日任玩 $85
星期五 全日任玩 $115
星期六至日 全日任玩 $150
以上價錢係包咗一個大人同一個小朋友，帶上呢條手帶就可以全日任玩，無限次出入，其實真係好抵，我2PM玩到5.PM出去食個DINNER， 6.30PM再玩到收工….玩足全日，大小朋友夜晚回家都宣佈無電10PM齊齊ZzZzzzz…….
另外見到呢度有包場服務，如果有生日會都可以考慮選擇喺呢度搞呢。
http://www.mabaland.com
作者： 小周董世界
