【小周董世界】將軍澳隱蔽公園 玩成層樓高滑梯

香港公園早前那條超長滑梯重開, 好多媽媽都好開心, 但將軍澳區原來都有一條成層樓咁高的滑梯,  但因為公園位置唔係太顯眼, 除左區內街坊, 其他人都比較少見到, 公園位於調景嶺, 由於上年先開, 所以公園好多設施都仲好新淨, 加上香港地好似己經越來越少見呢款銀色滑梯, 大人見到好多童年回憶都返晒黎, 唔止小朋友大人都想上去玩返一轉 ^^

 雖然話公園位置唔係太顯眼, 但其實好易去, 調景嶺A出口過馬路沿住單車徑一直行, 5-10分鐘就到, 非常方便.

 沿住單車徑一直行就會見到調景領體育館, 左轉上樓梯, 行到最頂再向右行就見到公園了。

調景嶺體育館及圖書館上年我都曾經寫BLOG介紹過, 有興趣可以參考返我的分享文。

 一去到公園小周董當然首先要玩下呢條成層樓高的滑梯, 成條滑梯無任何樓梯可以行上, 所以第一次要媽媽先上左去, 再抱小周董上來。

 唔係講笑, 我上到滑梯頂望落去都真係幾高 ((自己都有少少腳軟軟)) , 反而小周董完全唔識驚, 一下就SIR左落去囉!!! 好快啊~~

 第二次仲嘗試自己上去添, 講真, 太細既小朋友其實無咩可能自己攀到上去, 同埋上到去見到左邊位置欄杆位勁高, 小朋友太矮的話一差錯腳就會跌落地面, 所以太細既小朋友我都唔建議比佢地自己一個人上去玩, 始終玩都要注意安全呢。

 小周董表示非常刺激, 要求玩多3,4,5,6,7,8次….OKOK 係辛苦晒爸爸托佢上去囉~哈哈!!

 呢類滑梯可能特別快….而且咁高, 小周董真係好HIGH心 (開心), 嘻嘻!!

 除左條滑梯, 公園仲有好多攀爬設備, 所以眼見公園仲有好多較大的小朋友玩

 小周董細細粒係咁易玩下跳上跳落己經好開心呢

 爬來爬去消耗男孩子無窮精力

 小周董玩成層樓高的滑梯唔驚, 爬高爬底又唔驚, 反而行上呢個轉轉圈上面大叫驚驚~佢個驚樣太好笑啦!!

 如果驚就去隔離有個BB 少少既滑梯玩啦, 同樣成個滑梯都係無樓梯, 小朋友慢慢爬上去啦, 加油^^

 玩完成層樓高的滑梯, 再玩呢個短既, 刺激度大減, 但小朋友依然玩得興奮

 玩左成個鐘, 媽媽充當攝影師, 體力勞動呢D當然係交比爸爸啦, 小周董想隻船轉十個八個圈, 辛苦晒爸爸啦~哈哈哈

玩完當然要洗手先可以離開啦, 公園有啱晒小朋友高度的洗手盤同飲水機, 細心程度值得比個LIKE呢^^

 作者： 小周董世界