【傑。斯與晴】 帶著小B去旅行。台中酒店分享
終於完成咗”帶著小B去旅行”嘅任務，
整個旅程總算完滿結束，
所以接住會為大家分享一下今次旅程所住嘅酒店同一啲好去處！
今次老公亦都好滿意酒店安排，
酒店雖然係臨時臨急先去預訂，
但係我一啲都無馬虎了事架，
結果真係俾我搵到一間唔錯嘅酒店！
台灣，大多數酒店都會比較細，
即使就算係雙人房，
可能都只係得100零呎左右，
仲要得企缸，所以會好難幫小B沖涼，
因為帶小B同行，
所以喺揀酒店方面都要花少少功夫。
今次我地揀嘅酒店都係新開無耐，
只係開咗兩年左右架咋，
每間客房都比一般台灣酒店大（有22平方尺，即係二百幾尺），
而廁所亦較為寬闊，同時設有浴缸添架！
酒店外觀：
（相片轉載自 Hotel Cube Facebook)
外觀的確係比較具有時尚感
而且位於高尚住宅區附近
一齊睇下房嘅實景相：
（係，無錯，張牀係King Size）
小JM同爸爸一到埗已經攤咗落去，
小JM仲表示好舒服，係牀度不停爬來爬去添！
再來睇下個廁所：
廁所亦可以算係今個旅程好重要嘅一Part，
因為平時小JM沖涼係要用盤，
我哋怕如果無浴缸或浴盤嘅話小JM會驚驚同扭計。。。
所以真係揀咗好耐呀！
有幾樣嘢真係不得不提，
就係酒店嘅服務態度，真係要俾個「讚」！
要讚嘅係
：
－ 未夠鐘Check-in時仍然幫我哋Keep行李，
最重要係幫我Keep住小JM嘅食糧（人奶）
－ 係預訂嘅時候我哋無Request到要BB牀同浴盤
但酒店員工見到我哋有小B，所以幫我哋預備咗BB牀同浴盤
除咗浴盤之外，仲附加咗小膠櫈，方便我哋幫小JM沖涼
－ 酒店員工服務好，而且好有禮貌
酒店免費專車
除咗以上咁貼心嘅服務之外，
酒店原來係有免費專車接送住客前往逢甲夜市架！
每晚都會有車接送，
對於我哋帶著小B們嘅爸B媽咪來講真係非常方便。
想坐酒店嘅免費專車？
好簡單，只係打個電話預約坐位就可以架啦。
大約每半個小時就會有一班，而最夜一班會係十點半，都好方便。
如果唔想坐專車想自己坐的士嘅話都可以叫酒店幫你Call車架！
如果玩得夜想自己係夜市返酒店都唔算貴，
唔使跳錶，只需要 NTD＄85咋！
另外一樣想提嘅就係房間貼心嘅設計，
牀嘅兩邊都有插頭同牀頭櫃，
而插頭嘅設計亦睇得出係花過心思，
除咗係三腳插頭以外，仲有埋USB位，
真係方便晒我呢啲 “有機會” 帶漏插頭嘅大頭蝦！
（相片轉載自 Hotel Cube Facebook)
整體而言，
今次嘅酒店性價比真係唔錯，
值得推薦～＾＾～
舒適度：＊＊＊＊
整潔度：＊＊＊＊
服務度：＊＊＊＊＊
位 置：＊＊＊
下回幾會為大家介紹今次旅程嘅一啲”熱點”！
敬請期待！
歡迎聯絡我同小JM 參與產品試用
