| 日期 | 全年適用 |
大部份男孩子的玩意都離不開車，小周董都唔例外，無意中畀我發現香港竟然有一間可以玩賽車的餐廳Crazy Car Cafe ，有車玩已經係一大賣點，食物質素對我哋來講都無乜大期望，但估唔到呢間餐廳老闆竟然有一份堅持，令到香港少有一間賽車主題餐廳，食物質素依然可以保持高水準，最重要係價錢非常合理，平均每人消費百幾蚊有得玩有得食，就算爸爸同仔仔沉迷賽車期間，媽媽們都有啖好食，真係絕對值得推薦下畀大家。
餐廳位於荔枝角MTR附近，好容易就找到，一入餐廳先登記係純玩車定食飯，如果純玩車分別有$59 / $69 玩車六分鐘，呢度仲有派對包場服務，包場期間任玩賽車，真係聽落都開心。
我哋係來食飯隨便玩車~ 3位小朋友望到個賽車場已經非常興奮同期待。
DINNER SET有好多款，有頭盤、餐湯及主菜及飲品，每款只係百幾蚊，有少少想用”平”來形容~ 哈哈
沙律同餐湯係指定，沙律好新鮮，蕃茄濃湯真係非常濃郁，而且入口CREAMY，飲品加少少錢可以叫D special drink，加 $16可飲LIME SODA 等，或加$28 飲咖啡 (咖啡質素唔係茶記，味道非常香濃。)
主菜以意粉為主，其實我地叫咗6個SET，但抱歉因為之後啲小朋友掛住玩車，加上好肚餓，已經忘記左相機食先，呢碟主菜係煙三文魚天使麵，好香濃忌簾芝士醬汁，天使面軟硬度剛剛好，小周董 3歲人仔可以一個人食晒一碟，就知味道真係非常好味啦。
雖然無食物相，但都想特別介紹下個碟野菌意大利飯配黑松露醬，一上枱己經香味撲鼻，食落口飯粒較軟身，但味道濃郁而且唔溜，另外炸雞扒薯菜，薯條係厚切，全部新鮮炸起才送上枱，好香脆。我哋一家人本身對主題餐廳啲食物毫無期望，但呢度真係有好大驚喜，希望佢地可以堅持，不過我都明白餐廳人手未必足夠，所以點餐後都起碼要等30分鐘以上先有得食，雖然要等但全部食物都係新鮮做起，每款都熱騰騰上枱，我哋食咗1千蚊，每$200有一張賽車飛送，所以可以玩到5次~ YEAH!! ^^
小朋友的主菜當然係賽車啦，食飯期間記得要預先預約玩車時間，小朋友早10分鐘前先去賽道隔離休息區換好裝備，頭盔、護手護腳裝備都帶好就可以出發啦 ^^
呢架就係Crazy Cart，其實係一種三輪飄移車，車有一個飄移桿，拉起可以試做到打橫、甩尾等刺激動作，小朋友可以齊齊做「頭文字D」呢。Crazy cart分了3款車種，第一款是適合身高120cm以上的小朋友 (即係呢款)，第二款係成人XL款，最高負重量是240磅，所以可以父子一齊玩都OK。
第三款就係呢款BB賽車，只要識行就可以玩，十分安全，但每個鐘比較少場次玩到，所以要玩就要預早BOOK呢。
每場開始前工作人員都會先問問有無人第一次玩，如果有會先講解架車應該點操控，大家都明白先會開始。
賽道隔離有個小小觀眾區，小周董見到細表哥落場，好落力地大聲加油~哈哈
細表哥玩完，到爸爸同小周董落場，XL車原意FOR大人玩，但由於車身夠大，所以爸爸亦可以抱住小朋友玩，不過玩前就要先簽一份免責聲明，小朋友上車時就要攬住個CUSHION，以免駕駛期間撞到。小周董一上車明顯有D小緊張，唔出聲靜靜坐係度，相反隔離大表哥就非常興奮~哈
其實架車真係可以開到好快，見到好多大人飛車飄移，但爸爸們梗係確保小朋友安全，係度龜速行駛啦~哈哈
一節可以玩6分鐘，小周董玩左2分鐘左右開始唔驚，仲好HIGH咁同我SAY HELLO，爸爸亦安心咗可以加速行駛!!
玩完小周董好開心~ 不停話好快啊好快啊，而爸爸們都話好刺激，估唔到架車可以咁快，同埋唔係想像中咁容易操控，如果想玩飄移真係要練多幾次，佢哋一致覺得相當好玩，爸爸們都話玩一節唔夠喉好想再玩多轉，哈~ 果然賽車真係會令到大人細路也瘋狂。
最後要提醒各位小朋友，玩車時記得睇返自己高度，決定玩那款Crazy cart，好似後面小周董大表哥雖然只係６年級但己經成個大人咁高，要玩小童車真係會好辛苦同埋唔適合，加多＄１０玩成人車就會舒服好多呢。最後最後，就係．．．記得一定要book枱，我週末去真係全場爆滿，亦眼見幾班人想walk in都無位呢，所以記得book枱免得掃興呢！
小童車59元
成人車69元(每節體驗6分鐘)
食飯消費滿 $200可免費玩一節
今次係我自費去玩去食，純粹有好東西同大家開心Share，如果有查詢請自行聯絡餐廳。
Crazy Car Cafe
哋址：荔枝角長順街15號D2 Place Two 2/F
港鐵荔枝角站 D2 出口, 步行約1分鐘
電話：3428 5298
作者： 小周董世界
www.facebook.com/1437ritaandhim