| 日期 | 全年適用 |
而家適逢行山嘅好季節，個個山頭都人山人海，但好多山一行就行成4-6小時，想搵條行個幾鐘又可以睇到靚風景嘅行山徑？
筆者答您絕對有，今次筆者就係山頂發現到一條唔太多人知嘅行山徑。
嗱嗱嗱！筆者唔係介紹盧吉道呀，而係介紹位於盧吉道既──西高山！
我相信盧吉道大家應該好熟悉，就係環繞山頂行一個圈。
但西高山點樣去呢？今次就同朋友教大家點去。
其實盧吉道真係一條好好嘅行山徑，全程平路，又可以睇下風景，一家大細都可以行，仲有好多既遊樂設施比您玩下、影下相咁。
我同朋友仔都影下相先！
喺盧吉道行咗大約10-15 分鐘，您會見到一個涼亭。
因為西高山係無指示牌嘅，而且佢個入口位並唔明顯，所以好多人都搵唔到。
就係佢，記住沿住涼亭嘅左手邊行。
一路向前行就會發現入口處，就係呢個位。
之後就開始登上西高山之旅，您會見到一條好長好長嘅天梯，因為得一條路登頂。
大約有700級樓梯到，聽到好驚好似咁多級，唔洗驚，筆者同朋友邊玩邊影相，輕輕鬆鬆用咗大約90分鐘。
放心，啲石級好好行，上山同落山亦都係同一條路。
沿途風景好靚，您可以一眼望到太平山同維多利亞港嘅景色。
好多塔個座山就係太平山，佢都有552米高。
另外，西高山亦都係睇日落既好地方。
但因為冬天好快入黑，而佢沿途係無照明系統，雖然上山同落山都係同一條路，但都一定要帶頭燈以策安全。
差唔多到山頂，好野！大約用左90分鐘。
成功登頂！
點都要同朋友影張相留念嘅，呢度可以睇晒薄扶林同維多利亞港，仲有指示牌講您知唔同建築物嘅位置。
哈哈！仲比我哋發現西高山都有芒草，一定要影相啦。
影完相，只要沿路落番去就得。
小小既提示，係涼亭嘅右手邊會有一位伯伯賣懷舊小食。
筆者同朋友都忍唔住買左一人一包糖葱餅，10蚊一包。
食完嘢喺山頂嘆埋個日落就走。
希望今次會令您地發現除咗盧吉道之外，其實西高山都好正，快啲一家大細一齊去啦！
作者：LKY的慢活生活