開心聖誕又點少得迪士尼樂園!每年一到聖誕節,迪士尼樂園都會花盡心思營造溫馨嘅聖誕氣氛,今年當然都唔例外,打頭陣有化身成聖誕老人嘅高飛,聯同一眾迪士尼朋友為大家送上一個願望成真嘅幸福聖誕!
▲迪士尼樂園每一個角落都經已換好晒新裝,等緊大家嚟過聖誕!
今年迪士尼設計咗幾款「心願明信片」,等大家可以寫低聖誕祝福字句送俾親朋好友,喺美國小鎮大街嘅聖誕郵政局就可以買到。而且每張喺迪士尼寄出嘅明信片都會蓋上特別版聖誕高飛紀念印章,夠晒特別。
▲三款明信片分別係米奇家族、唐老鴨家族同大鼻與鋼牙。
▲紀念印章同樣有三款,以聖誕高飛做主題。
▲聖誕高飛有時仲會出現喺郵局門口,同小朋友見面影相。
喺美國小鎮大街將會有一顆18米高滿LED燈嘅聖誕樹,晚晚6點15分(11月18日至12月8日)同6點半(12月9日至2017年1月2日)都會進行亮燈儀式,到時再加埋漫天飄雪同大型投影燈光Show,小朋友睇到一定超開心!
▲一班迪士尼角色將會出現亮燈儀式,同小朋友一齊跳舞,真係諗起都覺得興奮!
▲棵聖誕樹真係好高,上面仲掛咗七彩顏色嘅LED,充滿冬日色彩。
今年迪士尼推出咗新嘅聖誕倒數日曆,由12月1日開始,每日打開一格日子,就可以得到一款迪士尼朋友Tsum Tsum。一連25日,日日有驚喜,買嚟俾小朋友做聖誕禮物就最適合。
▲日曆一共有25格,每一格入面都有一隻Tsum Tsum公仔,售價$1,288。
▲聖誕小熊Duffy 9吋毛公仔(港幣$198)
玩到攰,當然要買啲嘢食醫吓肚!迪士尼園區入有多間餐廳將會為各位送上最有聖誕特色嘅精美食品,除咗可以喺美國小鎮大街餐廳同迷離莊園嘅大冒險家餐廳搵到之外,仲可以喺各大小食亭買到。
▲精美糕點,售價由港幣$38起,可於市集餅店購買。
▲米奇熱朱古力,每杯售價$38。
位於美國小鎮大街嘅大街餐廳亦有提供聖誕套餐,每個套餐售價$268。
日期:由即日起至2017年1月2日
地點:香港迪士尼樂園