【Daidai & Pipi】一日環遊世界 @ 挪亞方舟「玩轉開心地球村」

 暑假就是要不停放電不停玩！皮皮今日約左朋友仔Dorian一齊去挪亞方舟方電~

估唔到黎到挪亞方舟一日可以環遊世界，去左世界不停地方玩足一日！

唔洗搭飛機，跳隻舞就可以出發，YEAH !

天氣太好了～梗係去戶外地方玩左先啦！

亞馬遜動物騎騎樂　—　可以騎住不同的動物車車遊走森林，阿皮選了隻大恐龍，好威啫你～

身高110厘米或以下之小童，須由家長陪同。。。皮皮爭幾CM，希望你快Ｄ高啦～大個仔少少咪可以自己玩囉～～～

唔好以為坐下電動車咁無聊， 挪亞方舟既姐姐會有小任務比小朋友，來認識一下亞馬遜既動物啦～～

真係曬到你阿媽都唔認得。。。

雖然話坐在車車上唔洗郁，但走左幾轉熱到成身汗呀～～～

騎動物車車幾好玩，皮皮話咁多個活動呢個至正啦！

除左第一個遊戲騎車是outdoor，其餘活動都係室內架！YEAH！唔洗熱溶你媽媽。。。可以嘆住冷氣周遊列國，爽呀！

轉個圈來到蘇格蘭，來一齊學習傳統軍操及軍鼓樂啦！

「蘇」FUN軍鼓操，小朋友來到可換上蘇格蘭傳統服飾。。。

一講到扮鬼扮馬，一向好有性型，懶係型既阿皮係唔會換架。。。（我滴汗＇＇）

今日有蘇格蘭公主教小朋友打軍鼓，其實套衫都幾型丫～我想換ＷＯＷ。。。

公主都幾風趣，小朋友一齊學習「生果盤」呢首歌，又橙又蘋果又車厘子又士多啤梨～～

唔知點解我腦哼住Twins果首士多啤梨蘋果橙＞Ｏ＜

蘇格蘭小軍鼓手們都幾留心學的，不過皮皮真係好搗蛋，成日搞笑囉，有咩咁搞笑呢？

你地黎到要留意蘇格蘭公主有咩好笑野講啦～！

之係到 德國「風」情大合奏～

呢度有外籍著名導師Andrew Birkun教小朋友演奏手風琴～

導師Andrew演奏得好好聽，小朋友化身手風琴小樂手，一齊合奏德國民族歌謠～～～

小朋友更換上德國傳統服飾，我蠻喜歡女生的裙子，好靚呀～一齊轉個圈啦～

最後大合奏成功！

學習過後，去看套搞笑話劇輕鬆下啦！

亞洲廚神奇趣劇　—　真是笑料百出，兩位哥哥好勁，舞蹈、雜技、戲劇於一身，同時講笑話，氹到班小朋友勁開心，仲一齊跳隻搭飛機舞，超級搞鬼～～

如果玩到攰攰地，不妨來裡看小話劇呀！唔洗chur住玩，輕鬆一下啦～～～

挪亞方舟入面除左暑期的主題活動外，皮媽會推介來到「方舟生命教育館」及「珍愛地球館」參觀，讓小朋友學習要環保及愛護地球，而且幻彩生命廊呢度有真既昆蟲、青蛙等生物睇架！真是很精彩～

皮皮跟Dorian已經玩到得意忘形啦！

另外「方舟生命教育館」呢度有個百變「萌」族自拍區，可以比小朋友扮野～

有美國西部牛仔、墨西哥、西班牙、日本及韓國等民族的特色服飾，都是免費租用來拍照～

黎到地球村，梗係著下唔同國家民族既特色服飾啦！影返夠本！～

來到圖工時間，「印第安變臉工作坊」有姐姐教大家整個印第安頭飾，同時嘗試面部彩繪，做個小土著～

皮皮終於定下來，專心整印第安羽冠頭飾～

完成啦！都很有心機畫圖和貼樹葉，乖果時都幾乖既。。。

最後一站是：和風扇DIY

小朋友接觸一下水彩畫，又幾偽文青～

人地叫你畫金魚。。你就畫青蛙＞＜都啱既。。。通常金魚池都會見到青蛙既。。。。

皮皮今日好開心，成日都話好想再來玩過， 挪亞方舟都幾大，活動很多一個接一個，我地都未行哂所有地點和展館，有機會找天一家人來慢遊，欣賞大自然和漂亮景色～

值得一提是豐盛閣終於出兒童餐！嘩！你睇皮皮和Dorian個樣就知幾豐富啦～～～穿梭機餐盒造型真是好驚喜呀！～～～細路仔可以自己有份餐食，開心好多～

挪亞方舟「玩轉開心地球村」

2016年7月21日至8月28日(逢星期四至日)（部份活動於指定日子舉行）