| 日期 | 全年適用 |
自從搬咗出市區之後
就覺得…兄弟二人好像比以前更加宅啦！
以前佢哋總係好鍾意落樓，行行企企、踩下scooter、跑跑跳跳，無無聊聊的
但現在，同佢哋講：不如落街行下啦，留喺屋企好悶呀！
佢哋就會答：我想留喺屋企喎…..
其實我都明嘅
以前住愉景灣，只要我哋一落樓
佢哋就會碰到自己啲朋友
然後幾個小朋友追追逐逐已經好開心！
而家，真係唔同晒啦…
搬到出嚟，冇人冇物咁，朋友都唔多個……
佢哋變得咁宅，或者是理所當然的吧！
對於佢哋快要成為新一代宅男
鴻爸爸真係唔太接受唔到
趁住暑假，爸爸決定要俾佢哋多啲出街
希望咁樣可以讓佢哋尋找到外出的樂趣
然後能夠成功脫宅！
上星期，去咗我哋最熟悉嘅坪洲
一落到船，細佬豬已經勁開心啦！
說實的，我真係好鍾意坪洲
每次一入到去，就會覺得好平靜、好舒服
其實坪洲比起長洲，真的悶好多架
係一個冇乜特別嘅小島
我哋入去，主要都係踩下單車，打下籃球咁
我哋有兩位踩單車初哥
喺坪洲踩，就最好不過啦！
其實朗朗半年前，先學識踩兩輪單車咋
而且嗰次成功之後，就再冇踩過兩輪啦
哥哥初時同我講，話想踩有輔助輪嘅單車
但我仲係覺得，佢係應該得架！大概只係欠缺信心吧！
踩咗幾下，佢就有點想放棄啦…
呢樣嘢真係似足我…
話時話，爸爸最近真係做得愈來愈稱職啦！
佢見朗朗搞唔掂，就同朗朗傾咗幾句，又鼓勵下佢咁！
好快朗朗就搵到踩單車嘅節奏
鏡頭一轉
又睇下魚仔細佬先！
超搞笑，單車店叔叔一拎出呢部車時
哥哥已經忍唔住，指住細佬狂笑
不斷指住細佬，恥笑細佬娘娘腔
又真係幾娘娘腔嘅…哈哈…
三父子好溫馨哦…
佢哋踩單車，我就周圍影下相
當時已經五點啦，不過仲係好熱，好曬！
仲係第一次踩到盡頭
有個小石灘，有間小石屋
住喺度就好啦！咁安靜、舒服…
踩咗陣，我地就去打籃球
包場咁打，超正！
話就話打籃球，佢地兩隻野都唔係路架…
淨係識得行行企企，跑來跑去
同埋玩個Daddy
無厘正經，都唔係打波嘅…..
唔想打就唔好打，我哋又唔會迫佢哋學嘅
等佢哋大啲，有興趣先囉…..
其實係咁易玩下，一家人笑下，已經好好啦！
最緊要大家都享受嗰下嘅快樂嘛……
好，餘下嘅暑假，睇下幾時再有機會，入多坪洲一趟先！
