| 日期 | 全年適用 |
夏天係去沙灘嘅好季節，唔想浪費好天氣，平日就要做足功課！香港有41個公眾泳灘，分佈喺南區、離島、屯門區、荃灣區及西貢區。「Oh! 爸媽」將會為大家逐一介紹，今次首先介紹南區。
最架勢嘅一定係赤柱正灘，13年曾經被外國網站評為最佳城巿海灘第10位；不過講到同港人最「friend」嘅，就非石澳同淺水灣莫屬。除咗呢啲，你又知唔知邊個南區泳灘最啱BBQ？又有邊個景最靚？邊個唔使同人迫？其實南區12個沙灘都各有特色，就連冇救生員、唔適合游水嘅夏萍灣以及石澳後灘，都一樣有佢獨特之處，等爸媽同小朋友一一體驗！
除咗淺水灣同埋冇救生員嘅石澳後灘，南區其餘8個泳灘都有BBQ場。大家第一時間應該會諗起石澳，因為石澳有多達39個燒烤爐，是全港沙灘之最，不過正因為咁亦特別搶手，好彩側邊有私營燒烤場，霸唔到爐的可以考慮租。
▲石澳有39個公共燒烤爐，同時有枱椅及太陽傘，算新淨，夏天太曬時都可以匿入傘下唞唞。
▲石澳燒烤場旁邊有小型遊樂場設施，可以給小朋友放電。
赤柱正灘左面亦有15個爐，沙灘向東，喺午後燒嘢食唔會曬親，不過因為周邊套配超強，所以都有超多fans，是緊接石澳最啱BBQ的地方。
▲燒烤區同沙灘分開，可以靜心看海、聊天。不過假日勁多人。
▲圖為早前端午節赤柱正灘嘅「盛況」，假日想搵個靚爐可想而知有幾難（林金展攝）
唔想霸唔到爐，不如考慮深水灣，嗰度有35個燒烤爐，泳灘遊客較鄰近嘅淺水灣要少。
▲深水灣夠晒多爐，不過有一大部分都無樹蔭。
▲雖然距離沙灘有一小段路，但旁邊仍有洗手槽
位於淺水灣與赤柱之間嘅舂坎角亦有24個爐，燒烤場面積夠大，仲要係經過翻新嘅雲石櫈。活動地方相當夠，閒日有唔少學校會選擇去嗰度旅行！不過到達沙灘前要行長長樓梯，如果有長者同行就要留意喇。
▲舂坎角燒烤區唔止新淨，仲有枱櫈在旁。
▲洗手間就喺側邊，但仍額外有洗手槽，唔使爭。
▲大大個公園，夠晒空間走動。
▲小朋友仲有遊樂場玩。
另一個值得一提嘅係夏萍灣。由於唔適合游水，冇防鯊網亦冇救生員，但就有22個爐，對正個海，清靜優美。從正灘出發約步行5分鐘，應該唔難搵到爐啦？
▲夏萍灣燒烤區向海，夠清靜。
▲但夏萍灣海邊多石，而且冇救生員，小朋友不宜玩水。
▲步行5分鐘就可以通往正灘，去到嗰邊先玩水啦！