| 日期 | 全年適用 |
一路都想帶兩個小朋友去行山，
遇啱今日天氣真係秋高氣爽(好老土)，
我哋揀咗一條又近又方便又短嘅行山路線嚟行 – 就係馬騮山啦！
我哋今朝落街食個Brunch之後大約11:40去屋企斜對面等81巴士，
諗都冇諗過住喺巿區，居然搭4個站巴士就可以有得行山。
真係話咁快就落車，只係坐咗約10分鐘過咗4個站就到。
一落車已經見到好多人同…馬騮，
以前以為只係得城門可以見到馬騮，
原來呢度都有超多！隔離個停車場一隻二隻馬騮爬咗上人哋D私家車度。
一落車會見到有個小食亭， 如果想補倉的話可以喺度入番少少貨。
行完山又可以喺度歇一歇！
我哋未開始出發時見到有幾個南亞裔朋友剛落的士，
佢哋將個膠袋就咁放咗喺路邊(裡面有水有嘢食)，
唔使三秒成袋已經俾馬騮搶咗去，
但係跟住其中一個男人拎起支樹枝想扮打佢，
點知令到隻馬騮發惡…我梗係即時帶佢哋走開D啦，廢事傷及無辜！
我覺得你俾佢搶到係自己唔小心囉， 冇得怪馬騮! (因這是他們的天性)
我哋見到有好幾隻塊面係紅紅地，有D係全紅…唔知係咪嬲緊，
所以都咪話唔驚，如果一個唔覺意俾佢睇中撲埋嚟，其他馬騮又跟住過嚟抽水就大鑊！
遠距離同馬騮仔影番張相先(兩隻馬騮一齊合照)。
今日我哋選擇咗條最易行又最多嘢睇既路線(難度1粒星)：
長源路 → 九龍副水塘水壩 → 九龍接收水塘 → 石梨貝水塘 → 金山路 → 九龍水塘水壩 → 返回大埔公路。
出發前影番張相先, 睇吓同行完之後有冇大分別。
行山必備: 執樹枝! 正所謂「有咩依郁，攞住碌竹！」
兩隻嘢當然就喺度鬥執支長樹枝啦！
行咗大約3分鐘度，就會見到右手邊有條路上燒烤場，
我地從左邊繼續行，
因為實在太多馬騮，所以我地停喺呢度影吓相！
溫馨提示：大家千祈唔好餵嘢食俾佢哋，因為你只要餵一次，之後佢就會跟住你唔肯走。
呢隻應該係我地見嘅最細版本mini monkey！超可愛，好打耳呀！
再行前少少又有分叉路，今次要靠右邊行啦！
好快就行到我哋第一個景點：九龍副水塘水壩，
望落去真係好高好高好高好驚呀！
呢個水掣房牆上面有獨特嘅花紋，
聽講話其他水塘好少會見到，所以要特別同佢影番張相留念。
下頁 – 水壩