| 日期 | 全年適用 |
「請問蒲窩點樣嚟架? 」我打電話問蒲窩工作人員. (哈! 真好, 連星期日也有人接聽). 原來由旺角去, 正正就是我們年年中秋節去薄扶林搭的970X, 到總站落車, 行過馬路就到.
原來, 窩點即是舊香港仔警署, 正正就是街渡碼頭對面. 嘩!! 20年, 我肯定上次過來香港仔是20年前, 就在對面上船, 我當年還問朋友:「E度邊度嚟?」(我係去完遊船河, 而唔係偷渡)
好彩就在轉上蒲窩的山路前, 有工作人員在免費派爆谷, SY一見即大叫:「爆谷呀!」, 否則我也錯過了要左轉的路口.
原來, 要上蒲窩需要行大約一百級樓梯…幸慶我一個星期也有數天捨電梯, 行樓梯上公司, 所以今日一點也沒有像阿太的氣來氣喘.
蒲窩每格一至兩個月, 就會舉行工作坊, 或藝術活動, 今日我們就是去學做菲林相機. SY:「相機?? 我點識做呀? (我:有爸爸一齊架麻)」
阿太問:「做部相機要幾多錢?」, 導師 Leo答:「唔駛錢, 因為匯豐贊助嘅」, 不過, 因為是淘回來的貨識, 所以始終不及原裝日本版完美.
Leo說:「今次是135菲林, 可能小朋友都未知菲林係咩, 其實E家菲林都幾難買, 今次就每人有一筒24張的菲林」, 囝:「即係咩? (我:即只可以影24張相囉), 吓? 唔係講笑呀? 咁影完就無喇, 咁水皮? 」
正當他想大力將菲林全條拉出之際, 被我大聲阻止:「唔好拉呀! 會走光架, (囝:係邊度有得睇D相?), 影完筒菲林, 就換另一筒米再影囉, 影完攞去曬相, 之後就有得睇架」
囝:「無得睇影成點嘅」, Leo老師聽到答:「咁估估吓, 先係菲林相機最吸引之處」 (係呀!當年搵阿太揸機, 十張有九張相, 曬出嚟實係無頭, 或者朦查查, 真係好吸引吓架)
本來預計個半小時的工作坊, 可能我手腳慢, 我足足做了3小時, 好彩Leo老師夠耐性.
至於相機就還未可以用, 因為上菲林的位置, 要回家用膠紙貼實才可活動, 所以, 只可以叫SY做樣來「扮嘢」就算. SY:「真係睇到架, 不過朦查查, 用電話影好過啦」
相機班旁邊有一個繪畫坊…一向不愛畫畫的小朋友:「畫畫最唔好玩, (我:咁咩最好玩?), 捉衣欣囉」(嘩!大佬又嚟呀??)
為了避過又要捉衣欣的「懲罰」, 我建議:「食爆谷會唔會好玩D呀?」, 隻眼發光的SY:「可以食咩? (我:食一杯囉)」
就在爆谷旁邊有一個大木架, 放滿盤栽的, 我問工作人員是否有工作坊呢? 他答:「本來E個流動種植車, 有一位花藝師教植物擺設, 不過今日取消咗…下次, 一月會再攪」
工作人員問SY:「你有冇興趣淋下花?」真的估不到阿囝竟然非常開心, 直接拿起水壺, 不停淋, 淋完又淋, 我怕會太多水將盆栽浸沒:「好啦! 夠啦!! 我哋去Canteen食朱古力啦!」朱古力一出, 誰與爭峰呢?
一踏入Canteen, SY即拉著我:「E度好似好舊咁嘅?」 咖啡師答:「係呀! 1891年開始, E度係香港仔警署, 之後50年前曾經改為水警訓練基地, Canteen正正就是槍房, 而後面就是覊留所」
我對SY說:「你扮被我覊留啦!!」SY:「即係咩意思呀? (即係扮坐監囉)爸爸你坐啦, 我唔要坐」
原來早前, 這裡被白蟻侵蝕, 所以古跡曾一度成為危樓, 需要關閉. 好彩2002年獲香港賽馬會捐款維修, 2009年被評為為香港二級歷史建築。
這裡更是中秋舞火龍的練習地方, 所以, 今日二父子又有一隻1:1的火龍給我們攪攪震…舞著龍尾的SY:「好重呀!爸爸」, 我:「個龍頭更重, 中秋D師傅點可以舉到咁高? (SY:係囉…咁重都唔好玩…走囉)」
這幢紅磚蓋成的建築真的很古色古香, 不過阿太說:「之前大埔舊警署好似正好多喎, E度好似水皮D…」
我也有此同感…之後我問一位對歷史非常有研究的同事M, 原來警署都有箇中的故事…
他解釋:「當年, 滿清政府租咗新界出去, 第12任港督「卜力」, 叫咗梅含理(即之後第15任港督)係大埔警署的位置搭警棚嚟接收新界, 當中原居民又與英國人發生一連串衝突, 所以大埔舊警署個歷史價值, 一定高過香港仔警署啦」
哦! 原來警局都有分一線與七線… 不過即使香港仔警署不是一班, 這裡超過120年歷史, 在紅磚紅磚的包圍下, 已經非常好Feel, 雖然未有被重建得像大埔警署的驚為天人, 但這裡一樣有少少世外桃園感覺…
少少的種植耕地…小朋友走了入去, 我便大叫:「有蛇呀!」…嚇得他9.9秒連走帶跳的衝了落山坡, 當我哈哈大笑時, SY不悅:「爸爸!你好曳, 講大話…我好驚蛇呀」
蒲窩於下月16號, 16/1/2016(星期六), 又再有開放日, 青年藝術節, 時間︰12:00-18:00
而『花藝木架工作坊』亦會不時藉流動種植車, 讓大家參與, 大家你可以親手將火龍果幼苗移盆，然後帶返屋企種植 (費用全免), 詳情可留意蒲窩青少年中心 ( Facebook & IG: warehouseteenageclub)
蒲窩:
地址: 香港仔大道116號
電話: 28732244