| 日期 | 全年適用 |
我地三口子嚟左一個新地方遊覽，但其實……依度都唔係新，開放都已經有九年。由當年旅客必到景點，到依家人煙稀少，都真係好大對比。講真，如果唔係陪奶奶嚟參加屋企啲香港一天遊，我估我都唔會諗起有依個地方。不過，原來整個環境都好正，依度咪就係青馬觀景台啦~
一嚟到小小豬就俾個介紹牌吸引住，好似好留心咁研究個構造~
原來佢嘅開放時間都好長，想幾時嚟都可以啦~
由停車場行一段行人天橋之後，就可以去到旅客中心層，地方乾淨唔在講，整個環境都好舒服，仲可以遠望到汀九橋添~
另外，仲有幾座免費嘅望遠鏡，等我地可以睇清楚青馬大橋呀~
咁靚嘅VIEW緊係要影返張相啦(係呀….我地又嚟親子裝啦，趁依家小小豬仲係好鐘意同我著一樣衫時就著多啲，都佢大個仔就未必肯啦)~
之後我地就沿住條小路慢慢行，邊欣賞四周景色邊行上高一層嘅觀景台~
一行到上去……真係要嘩一聲，因為個VIEW真係仲正~
青馬大橋同埋汀九橋睇得仲清楚，好正呀~
仲有一啲和風式嘅涼亭，配合埋依個咁靚嘅天色，真係夾到冇朋友，坐係度一陣都覺得好舒服呢~
不過，依個攪笑小小豬話都係鐘意係樹底下休息多啲哦，因為有樹葉幫佢遮太陽呀~
由於我地逗留時間唔多，所以我地舒舒服服咁坐一陣，又欣賞左啲靚橋景之後，我地就要走啦。利用埋最後少少時間，邊行邊欣賞風景啦~
依度整體上都真係唔錯，唯一需要留意嘅係洗手間問題，原來整個觀景台係冇洗手間設施，如果有需要就要行返去停車場旁嗰一個大型洗手間，不過…..由觀景台再行去洗手間都真係有一段長長地嘅路程，都大約需要10-15分鐘，所以大家記得去觀景台欣賞風景時，先去左洗手間先啦。
小小豬就係因為係我地欣賞緊風景時話肚仔痛，所以我就要同佢極速狂奔九秒九咁跑去洗手間，都真係幾辛苦，所以大家唔好學我啦！
雖然我地逗留時間都唔係好耐，只係短短入嚟坐一陣都覺得人都輕鬆啲，清清靜靜加上個景又咁靚，所以都幾推介俾大家。渣車人仕仲好，因為依度係個停車場係免費泊車呀！
其實依度個日景靚之外，個夜晚仲更加吸引，兩條大橋燈火通明時，都應該係好莊觀呀！
老公已經話左下次我地去路經附近時，渣車入嚟行一轉，帶我地感受埋個夜景呀！(希望…..唔洗等好耐啦！)
作者：小小豬的成長日誌
(FACEBOOK：https://www.facebook.com/kinseymama)