| 日期 | 全年適用 |
上星期六, 我們乘旅遊巴士往粉嶺途中, 我跟阿囝說:「做農夫真係辛苦, 我有幾耐未試過放假要7點鐘起身呀!」, SY輕描淡寫答:「你日日瞓到晏晝之麻, 我唔覺得早吖」
因為這位小朋友7年來也討厭睡覺, 我絶對覺得對牛彈琴, 不過奇怪我超級愛見周公, 為何SY會每次放假, 一定比返學更早起床呢?
今日我們與160個家庭, 到粉嶺綠田園基金參加Kinder舉辦的親籽農場體驗, 朋友前一晚提醒:「記得要帶多對膠鞋畀SY, 因為要落田割禾, 會成腳泥架, 如果唔係就最好赤腳, 之後洗腳…」
我一聽到「成腳泥」突然打了一個冷震, 心想:「講笑咋??乜唔係做樣耕田, 淋花咩? 」結果農夫叔叔對穿波鞋的我們大叫:「你哋除鞋啦, 唔係連襪都係泥啦, 因為落完雨, 啲泥好濕呀」
我對農夫說:「不如你同佢一組扮家人啦, 我怕污糟, 最重要我要影相…」農夫答:「你洗腳米得囉…我影相都好叻架」, 潔癖怪當然不會就此犧牲, 於是就站在田邊, 看着農夫叔叔與SY割禾…
原來, 每人只可以割禾2束…哎呀!SY真的雙腳滿是泥, 好彩我沒有下田, 我對SY說:「唔抵呀!整到咁邋遢, 割咗兩下咁少」, SY:「係囉! 我想再收割, 好好玩呀…(你快快去洗腳啦, 我見到咁多泥就驚喇)」
玩完割禾, 之後就打禾, 簡簡單單一台木製打穀機, 就引起了在場所有小朋友的興趣, SY興奮大叫:「踩快啲啦爸爸, 我哋要打多啲米出嚟呀!」
除了人力發動打穀機, 在場還有一台最原始, 如洗衣板的手打木桶, 我真的估不到, 小朋友連手打的機會, 也不放過, 打完又打, 甚至沒有稻草時, 他自己去找了一堆已新的稻草過來再打.
盧叔叔見SY落力非常, 笑笑口問:「小朋友你好鍾意打穀? (SY點點頭), 不如我用稻草做隻稻草人畀你啦」我八卦問盧叔叔:「你學咗幾耐扎稻草人?」
盧叔叔中氣十足答:「邊駛學架, 我哋細細個係田就係攞D稻草嚟玩啦, 扎下扎下自自然就識」, 果然不用3分鐘, 稻草超人就出場…
不過, 稻草超人的魔力, 絶不及打穀吸引, 因為SY全程沒有理會稻草超人的誕生, 完完全全自己不停打穀…(又應驗了我上次的說法…我囝前世一定是農夫呀)
完成打穀後, 我們便進行第三個工作坊, 小手做麵包. 我們親手搓出一舊已經有8成完成的麵團…(好彩, 連老師都知道小朋友一定沒有心機搓啦, 因為搓得唔均勻, 出嚟個包會好硬)
SY:「不如做一做雪人包, 好唔好呀? (我:好!點解你會諗到整雪人?), 因為雪人應該好好食囉…(吓??? 其實阿囝…你整咩公仔個味應該一樣喎)」
完成後我們塗上蛋黃…我很貪心的叫SY塗多一點啦…誰知老師說:「唔係搽咁多呀, 出嚟會好燶, 唔好食…(我:係咩?? 我仲以為愈搽得多, 蛋味愈濃添)」
焗麵包只需18分鐘, 我們就在等待的時間吃三文治當午餐…(嘩!玩咗成日…先係中午, 平時我先啱啱起身咋)
吃飽飽…我叫SY走到薰衣草前拍拍照, 農夫叔叔說:「E啲唔係薰衣草嚟架, 雖然人人都話似, 但其實係涼粉草…(我:原來涼粉都咁鬼靚)」
很快小朋友們的公仔麵包便出爐, 熱辣辣香噴噴的麥包, 本來揀飲擇食的SY從不吃麥包, 他竟然主動要求:「爸爸! 可唔可以食呀? (我:你頭先又話飽?), 我整架麻, 好想食呀!」
結果他一個KO了大半個齋麵包, 若果平日的話, 這位奄尖大少一定對白麵包搖頭拒絶!! 自己手做自己食的魔力, 真偉大.
吃飽飽…我們走了去餵羊…去年他餵了一次, 由害怕到上癮, 今次他老實不客氣, 捧了一大堆稻草過去…邊行邊笑:「羊仔有排食啦…」結果…
大黑羊一口也不吃…我懷疑是一大堆小朋友圍着牠, 令牠害怕…不過工作人員說:「平時遊人畀有機菜, 畀生果佢食, 本來羊就梗係食草…不過食慣好嘢, 你係羊都唔會食返草啦…(我:又係喎)」
晚上, SY不停回味割禾, 打穀…不時說:「真係好玩, 幾時再可以玩??」原來, 綠田園基金經常也會舉辦類似工作坊, 看來, 如果要再落田, 下次都是找阿太陪比較適合啦.
粉嶺綠田園基金
http://www.producegreen.org.hk/event2.asp#236
地點：粉嶺鶴藪村綠田園
鳴謝: Kinder 康脆麥親籽日
作者：大仁生活