| 日期 | 全年適用 |
秋天一嚟到，最想做嘅事就一定係約埋一班好友齊齊去郊遊，輕輕鬆鬆行下山感受大自然。
好唔知醜地講，我其實咁大個女都真係未去過行山，我唔係唔鐘意戶外活動，但係要不停咁沿住啲石級嚟行，一諗到呢一點….即刻令我卻步。
係一次傾談間朋友仔問有冇興趣去睇螢火蟲？我自己咁大個女都未親眼見過螢火蟲，當然係有啲興趣。再加上我又想同小小豬感受一下大自然課，親身見下螢火蟲，所以我地就決定嚟一個親親螢火蟲啦！
由於螢光蟲最活躍嘅時間就係晚上6點至8點，所以我地就我6點鐘開始慢慢沿大埔滘自然教育徑行上去啦！
雖然係第一次行山，不小小豬嘅狀態都好好，成日螢光蟲掛係口邊，又邊唱歌咁沿住樓梯上慢慢行，而且仲越行越快，真係精力無限。反而我….行幾步就真係已經冇力，簡直係十級攰，不過既然選擇左開始，咁就要堅持行埋佢，最多行幾步就坐係石級休息一下~
為左照顧我，小小豬佢地都已經慢慢行。越行越入….又越黑，我地都只係靠小小嘅燈光繼續向前行，其實我都真係口驚驚地，但呢隻大膽豬越黑越興奮，真係俾佢笑死!
但就係呢個時候，我地見到第一粒螢火蟲係我地面前飛過，嗰一刻心情都真係好想尖叫出嚟！小小豬仲更加唔肯行，要企定定再等螢火蟲飛埋嚟。小小豬見到螢火蟲個興奮樣子，我咁辛苦行上山都係值得呀！
之後我地繼續行，就搵到小平地，就可以坐定定慢慢等螢火蟲(順便又係我休息好時機)，小小豬仲話要比賽鬥快搵螢火蟲添。雖然冇電視睇嘅一群群飛嗰一種「嘩嘩聲」，但我地加加埋埋都有見到十數粒螢火蟲，雖然只係遠觀，但都令人心情好興奮！
我地唔可以用強光直接照射螢火蟲，更加唔可以用閃光燈影相，係依伸手不見五指環景下，都唔預期可以影到螢火蟲嘅相片，所以就靜靜地耐心咁等螢火蟲係我地面前飛過，將叱個回憶留係我地腦海入面啦！
由於我地裝備未係完善，所以都只係行左一半教育徑就返轉頭了。其實小小豬都有點意猶未盡，等我地預備好晒啲重裝備，趁11月依個黃金時間，一定要再會螢火蟲！
作者：小小豬的成長日誌