| 日期 | 全年適用 |
秋天秋高氣爽最適合就是郊遊啦！中秋節幾日假期，當然要約下朋友去玩，比小朋友放下電啦！一早約埋國皇同80後一家去川龍飲茶，再去行城門水塘睇馬騮！可惜當日魚仔發燒，最後就得我地同國皇一家去玩啦！
其實我住係荃灣應該都有20年，從來未去過川龍飲茶，原來係荃灣坐85號小巴上去，都是大約 10-15分鐘車程，又唔遠喎。
呢度飲茶是全自助式，連茶都要自己沖。(真是麻煩晒 Mandy啦)
點心當然都是自己拎！當然是 2位猛男負責啦！
hehehe…我呢？就坐係度影下小朋友啦。
小丸子因為要食，我地唔記得帶餐具，佢今日學識咗用筷子！
有Mancent陪，連大頭妹…都識用筷子。但我之後再要佢用，佢已經唔肯用，又要用返匙羹，真是激死人呀！
講返川龍的點心，味道都唔錯，食懷舊的味道，而且食完唔口喝，應該無味精。
叉燒包，比小朋友們食晒。
馬拉糕比較硬，小朋友唔幫襯！
鳳爪，普普通通。
牛肚好味道！
呢個雞札非常足料，竟然有好好味的芋頭，真是好感動！依家好多都無架啦，變咗條蟹柳！
咸水角，無特別。
呢個鵪鶉蛋燒賣真是好好味，蝦同肉的比例是一半，而且唔係淨係肥豬肉。
好耐無見過的紙包骨，阿旺話細個去酒樓好恨食，因為係大點，唔係次次都可以食。有時就係咁，我地細個生活可能窮少少，不過我地就學識「珍惜」，依家小朋友，樣樣得來太易，反而唔識珍惜，不過又係小朋友的錯？定係家長的錯呢？
嚟到呢度，當然要食「西洋菜」啦！真是好甜好好味！
腸粉，小朋友的最愛。
呢個大包真是好大，入面仲好足料。
蝦餃，小丸子自己話要食，我估佢平時同爺爺嫲嫲飲茶有食。
沙翁
芝麻卷，呢度的芝麻卷是熱嘅？
最後當然唔少得山水豆腐花啦。
嘩﹗大家估下我地食咗幾多錢？我地咁食法，最後埋單只是 $410，真是好抵！
對於我來講，我今日其實只是想去川龍飲啖茶食個飽，但對小朋友來講，他們有用不完的能量，當然要再放下電，所以我們飲完茶又再坐小巴，返荃灣的小巴站，再轉坐82號小巴上城門水塘行山和睇馬騮啦！
哈哈…睇我個笑容就知我「鍾意」行山啦！
唉！咁小朋友…又真是玩得好開心！
比小朋友接觸下大自然都是好嘅。
呢度風景都唔錯。
嘩！行行下聽到後面叫，原來有馬騮搶咗Mandy手上袋垃圾，隻馬騮飲Mancent同Marcus飲完的蘋果汁！
就係呢隻啦！行城門水塘，真是唔好拎住食物，馬騮必搶！
我地本來想行去主壩，但原來我地行錯方向，如果落小巴向前行，即BBQ方向，應該半小時就到水壩，我地上咗山個邊，應該係行唔到，尤其係帶住 4個小朋友。
行行下見到牛群添呀。
叫小丸子同牛影相…佢掛住飲橙汁。
都有6-7隻牛一齊食草。
行到3:00，我地就折返，行埋城門水塘遊客中心，涼下冷氣。
睇完真馬騮，小朋友對呢啲假馬騮已經無興趣了。
嘩！睇返地圖，我地行咗大約 1/4 – 1/3 咋！
最後再去小食亭買雪條食，食完就坐車返屋企啦！真是好充實的一日！
交通
專線小巴 85：荃灣 – 川龍
專線小巴 82：荃灣 – 城門水塘
彩龍茶樓
地址：荃灣荃錦公路川龍村 2號 (85號總站落車就見到)
電話：24143086
作者：傻夫婦一家四口生活日誌