| 日期 | 全年適用 |
秋天最適合進行戶外活動，趁住好天氣。 我哋今次再次出遊元朗嘅「大棠有機生態園」，睇返原來對上一次去已經係2017年嘅事啦。
進入生態園，都需要購買入場券。
園內有戶外兒童遊樂場、大型繩網陣、馬房、動物園區有羊、兔、孔雀、鴕鳥、魚池等。 亦有空間讓小朋友遊玩奔走，仲可以騎馬、玩充氣彈牀、兒童遊戲車、DIY手作坊。
^「大棠有機生態園」地圖 我哋咁耐冇去，場地嘅設施都已經唔少少同咗了。
多咗戶外兒童遊樂設施，仲可以玩家庭式單車。 參觀馬房/ 餵馬/ 騎馬 對上一次嚟，我哋都有參觀馬房。
今次嚟到，我哋再試咗騎馬!! 和牛B超期待，亦係第一次騎馬!! 佢好興奮好緊張!!
不過，一到上馬佢就好緊張，有啲驚… 最後馬仔行咗兩步，就嚷住要落馬了。 唔緊要，嘗試過就好了，遲啲再試過啦~
巨型繩網陣> 大人都可以入去玩，巨型繩網陣目測都有成2-3層樓咁高。 真係好刺激，大人仲可以陪住好動嘅小朋友上去玩。
巨型繩網陣旁，仲有盪鞦韆。
^休憩地方
戶外兒童遊樂場 遊戲大多都係繩網為主，幼兒未必玩到。 不過草皮超大，可讓小朋友盡情放電!!
園內仲有家庭車，可用遊戲票換，每次可玩15分鐘。
動物村，呢到集齊多種野生動物。 有羊、豬、野豬、孔雀、火雞、兔仔等。
如果想親親小動物，餵動物的話，仲可以用遊戲票換糧餵佢哋食。
**不過嗯個園區超多烏英，所以我哋好快就轉地方了~~
呢到仲有香港好少見嘅鴕鳥同埋鴯鶓，佢哋嘅位置係喺近出/入口嘅位置。
^ 鴯鶓 (澳洲鴕鳥) 特式單車、充氣彈牀遊戲 (需要遊戲票或購買任玩手帶)，單車款式可以自由選擇。
DIY手作坊>
^ 可以用遊戲票換一次手作坊
^ 付費嘅手作坊
影相位>
^ 好似去咗侏羅紀公園咁~~吼!! 魚塘仲有好多錦鯉、仲有好少見嘅黑天鵝。
^魚糧可以用遊戲票換一包又或者$25買一包。
^記得千祈唔好將魚糧餵黑天鵝食呀，佢哋唔食得㗎。
入場費用
基本入場費$50（大小同價），套票$80/4格套票，套票主要是玩付費的遊戲。
另外亦有套票+全日玩手帶（只限兒童遊戲車及彈跳王國）
$130
場內設施
入口位置對出，有流動廁所。 當日去廁所都算乾淨企理。
前往方法
交通工具：
1.朗屏西鐵站B出口，乘搭K66巴士 2.大棠道千色廣場對側紅棉圍乘搭大棠專線小巴 於大棠道路口步行若15分鐘左右便到達。
自駕人士：
駕車的話可依照下面官方地圖前往，園區設有露天停車場，但留意他們只設有日泊$80，並不設時租服務。 
如果需要的士電召服務，場內都有張貼資料。
戶外活動小貼士：
疲情期間，雖然地方空曠但都係公眾地方，大家記得要戴好口罩，保護自己保護其他人，及勤用消毒搓手液/ 洗手。
戶外地方比較空曠，除了會帶帽子外，亦建議出發前半小時為小朋友塗上防曬，謹記後頸位置都要塗，以及定時補塗防曬乳哦。
另外，防蚊措施都要準備好。一般我會帶上蚊夾、蚊貼及蚊怕水。最後，照顧小朋友嘅防曬、防蚊之餘，大人都要為自己做好準備哦～
元朗@大棠有機生態園 (又名：大棠荔枝山莊) 開放時間：9am-6pm 網址：http://yl.hk/taitong
————————————————–
Facebook專頁:和牛B嘅成長專頁
Instagram: wagyubmami
作者: 和牛b的成長日記
相關文章：
