| 地址 | 青衣公園 |
弟弟實在太小機會曬太陽，所以趁爸爸放假一齊帶兩兄弟去公園行下，我哋今次去咗青衣公園，諗住順便睇下紅葉，因為公園內的人工湖旁種左好多落羽松，每年1月左右就會開始轉紅，我哋今次去到未完全轉色，遲多少少黎一定會更靚！
雖然未有太多紅葉，但有一大遍黃色的園景一樣好靚呀！金黃色的樹木下有兩個人工湖，湖上仲有幾隻白鷺，Aidan話好開心見到白鷺，佢仲睇咗好耐，一見到隻白鷺飛起就勁興奮。
青衣公園仲有個小瀑布，加上我哋4點幾去的時候太陽光線射落湖水度好靚，都幾有童話般的感覺，影相一流呀！
行入啲仲見到好多大紅花係小斜坡上，遠距離打卡都幾靚㗎。
青衣公園雖然唔算大，但都有野餐區，俾小朋友放下電，跑下都唔錯。
兒童遊樂場而家暫停開放，但見到都幾大，好啱小朋友玩。
公園內有間餐廳，肚餓都可以買嘢食。
簡簡單單行下公園真係好舒服，小朋友又開心，弟弟仲可以晒下太陽，好滿足！
行完青衣公園仲可以去埋青衣城行下街，過條天橋就到，好方便！
交通：青衣地鐵站B出口出，穿過青衣城步行10分鐘就可到達。
***欣賞紅葉的人都算多，大家一定要帶好口罩，保持適當的社交隔離呀！
—————————————
歡迎連絡安妮媽媽：
Facebook專頁： 安妮媽媽親子日記
IG: @Annie_mama_diary | 安妮媽媽親子日記
E-mail : [email protected]
作者﹕安妮媽媽親子日記
其他文章﹕