【海笑】室外・免費

早排觀塘間「夢想」play room出事，波波池有釘突出，搞到細路仔頭破血流，最初仲要死撐，過幾日至肯賠錢及道賺，但之後應該幾難做生意，至少同一個地址、同一個名、同一個註冊老闆，父母見到都唔會上去。

小弟之前都去過大型play room，就算那間聲譽算唔錯，但我都幾唔鍾意，或者聲音問題，或者格局問題，給我感覺幾唔舒服，加上個仔去到都唔算特別開心，所以去過一次都無再去。平日反而鍾意去室外遊樂場玩，地方空曠，見到太陽，聲音不焗，加上個仔行得特別起勁，感覺舒服好多。平日去得最多屋企附近的荔枝角公園，都是那句，夠大，唔單止公園大，連遊樂設施都夠多，唔會太過迫，園內還有草地，可以讓孩子行或爬草地。有時得閒都會去維多利亞公園，同樣道理，地方夠大，設施夠多，仲可以睇人玩遙控船。

至於第三個喜愛，就是香港公園，地點同樣方便，金鐘站直上就是，玩完濕身涼亭，走過靚靚公園，就到兒童遊樂設施，先講條滑梯，夠長夠斜，正喎。但重點是沙池，有一大個玩沙的地方，好讓孩子可以接觸沙粒，不只是玩玩遊樂場就算。對於我也更為方便，我家距離各沙灘都遠，屋企無車，有時唔得閒去沙灘，金鐘站確實是個很好的選擇。

或者會有些人喜歡play room，特別是炎炎夏日，但我還是推介戶外地方，一來平日工作都在室內，想曬一下，出一身汗；二來我家孩子的反應，在戶外較賣力；三來公共設施，免費。我突然又諗到，我自己踢波都鍾意室外場，踢過工廈的室內場，感覺就是不對，都係幫襯過就算，有些事，還是戶外做比較合適。

作者: 海笑

Facebook: 海笑OceanLaugh

其他文章：

【海笑】前戲比戲肉更精采的玫瑰疹

【海笑】對，會放棄很多。