今次要講嘅另一條「食完飯無嘢做想行就行」的市區行山路線 ——- 「青衣自然徑」
同好hit嘅「青衣三支香」行山路線唔同，果條係青衣南，呢條係青衣西 —– 一條for晨運用的輕鬆散步徑
「青衣自然徑」利害的地方唔係因為佢西，而係佢鄰近市區出入方便，仲非常非常易行! 長者小孩都絕無問題~
更重點係沿路望住青馬大橋全海景日落嚟行!
方便、易行、有靚景，一次過滿足晒三個願望! 好難唔大力推薦下wor!
內容概要：
-交通方法
-「青衣自然徑」北面入口
– 3號觀景亭休憩處
– 由青瞰徑轉青雲徑至2號觀景亭
– 1號觀景亭無敵日落
– 葵青慶回歸個名好7健康徑至南面入口離開
「青衣自然徑」位於青衣西北方，長宏村隔離。定位係「晨運路徑」，設計上本身就係俾老人家小朋友和12隻恐龍去野餐的，咁條路難極有限啦~
事實上「青衣自然徑」的樓梯非常少，上落都只係兩三次左右，大部分平路，就算腳力唔好嘅朋友應該都能應付自如~
廢話少講~ 起行啦~
今次我選擇由北面入口開始~
由青衣城坐248M約10分鐘至長宏村總站，落車面前駛入嚟條馬路轉左行上斜，約5分鐘就會見到入口了~
^轉左，圖中小巴果個位向上行
使唔使一開波就整條咁長既樓梯呀!!
不過放心唔好俾佢嚇襯，細細級好易行，而且往後咁長嘅樓梯都無乜了
先苦後甜下先啦~
不過建議大家唔好行太慢，好鬼多蚊…….
一行完樓梯幾步已有嘢睇，
呢個好似係船廠同汀九橋吧~
睇地圖好似好遠，但10分鐘已經來到第一個check point 4號觀景亭
理論上唔會需要係度休息啫，繼續行啦~ 分叉路行右去3號觀景亭呀~
^4號觀景亭
行多15分鐘就到達3號觀景亭休憩處~
呢度景觀無乜，不過地方大兼有好多正常單槓及土炮單槓，仲有平衡木，十足一個小型體操訓練場
基於呢條係晨運徑，可以想像清早時分該有唔少銀髮阿伯係度練習度卡卓夫前空翻
^《我要高飛》藤卷駿自創的度卡卓夫前空翻，呢套漫畫都唔算好偏門je~
^得呢張影得清，因為鏡頭後我做緊胸部旋轉大迴環