| 地址 | 已連拿利 |
| 日期 | 全年適用 |
某日見到美女網友張相 pre-wedding 非常有趣~
有趣不在於俊男美女，而是拍攝地點前所未見 ——— 像是一條森林裏的空中隧道，同時帶着荒涼感與未來感
泰國？ 印尼？ 馬來西亞？
但當時已經疫情咗半年，按道理應該去唔到外國㗎，於是忍唔住問下佢呢個係咩地方
佢俾咗我一個稀奇古怪的香港地名 ——- 「己連拿利」
呢個名我寫包單10個香港人有9個都未聽過 !
己連拿利？我連拉雲拿利同史高拉利都唔熟呀 !
Google吓，先知道己連拿利 Glenealy 原來係中環半山區動植物公園旁的一條小徑
根據維基王所講 ：
己連拿利（英語：Glenealy）同時是香港的街道和地方，地名全名為己連拿利谷（英語：Glenealy Ravine），前名為忌連拿利，但因忌有「忌諱」的意思，1970年左右改為己連拿利，是香港僅有同時沒有中文及英文後綴的道路。
嘩睇完之後真係覺得自己好唔熟香港呀!!!
好啦無得出國，一於發掘吓呢個香港鬧市中的隱世攝影位啦~
– 前往方法
– 聖母無原罪主教座堂
– 己連拿利小徑
– 己連拿利天橋
– 己連拿利夜景
– 聖母無原罪主教座堂夜景
當然可以自己行上動植物公園啦~
不過懶鬼唔想行嘅我，就由中環坐扶手電梯，一直上呀上呀，過埋SOHO，到達堅道48號，再落返地面沿堅道向金鐘方向步行約7分鐘
到達動植物公園後轉右上斜 (見下圖)，就已經係己連拿利了~
大迴旋處見到的係港島名校高主教書院
咁睇嚟呢間學校嘅學生應該對己連拿利好熟啦~
不過作為一個教師，我更加concern嘅係 ——– 間學校咁遠點返工呀??????
唔使咁急上己連拿利住~坐落於高主教書院旁的「香港聖母無原罪主教座堂」，係有過百年歷史的香港一級歷史建築
唔知係咪太耐無去旅行，竟真係有一剎那令我覺得回到歐洲，估唔到香港竟有如此巨大而純白的哥德式大教堂，好感動呀哈利魯亞!!!!!! (我唔係教徒唔住半山，唔識佢好正常呀)
最重點係教堂前有一空地廣場，只要教堂無活動+小心車輛就可以點影相都得!
影完當去咗歐洲啦~
落返迴旋處再上斜，轉個彎兩旁已突變為叢林的法則 !
仲有一個神秘的引水道，睇落非常恐怖，絕對會有條洞口咁大嘅鰻魚標出嚟咬你!
我係咪打得Mario太多呢…….
更有趣的是從下而上看，半山區那錯綜複雜的高架道路，劃出了各種不規則的弧線圖案
如果係攝影高手，應該可以影到唔少「咁都得？」嘅有趣作品~
可惜我唔係，只能有此拋磚引玉引大家嚟啦~
離開小徑，沿路直上至羅便臣道~
唔好理，再上幾及樓梯，就會到達今次的目的地——「己連拿利天橋」
呢度……真係香港？？
怪不得我朋友會揀呢度影pre-wedding啦!
實在難以相信在港島鬧市中，竟有這麼一處彷如未來世界般的荒涼秘景!
一條彷如電影場景中才會出現的空中闊道，緩緩彎曲向上，四周滿是高聳林木。明明頭上腳下都是車路，四周卻異常寧靜，簡直是原始森林與石屎森林的完美融合!
^較灰暗色調後更有末世感，係度見到北斗拳四郎都唔奇!
^影自己係少不免㗎啦~
^亮燈後更有feel~
^上圖係貼近原色，呢張大幅調低色彩，又係另一感覺~
^Chok係少不免的~
如果說這裏是科幻片場景，更不如直接話係「阿凡達森林中的機械人出入隧道」更貼切!如果突然間有架高達係前方滑落嚟真係一啲都唔奇!
而係男仔的話，更應該會幻想獅人鳳係呢度出擊啦!
(絕對無敵獅人鳳or雷神王，90年代著名動畫，由小學生駕駛的機械人是由學校變形而成~ 但我睇番都唔覺邊忽同己連拿利相似……..唉是鬼但啦~ 當借啲依分享吓童年回憶~)
而呢條神秘道路真係非常神秘，幾乎鬼影都無隻!
我係呢度又set腳架又擺Post大龍鳳近兩個鐘，成套歡樂滿東華做晒，行過的生命體唔超過廿個!
這條路基本上只有遠足落山人士、住半山的富豪外籍人士，及狗隻與它的外傭人士才會使用。咁呢篇文出咗街後，會唔會又好似「三門仔」和「鹿頸谷埔」咁多咗成條美孚新村嘅人去遊覽呢？
hey無事嘅……….我邊有咁大影響力呢……..無事嘅無事嘅……….
入夜時分的己連拿利又是另一個感覺~
昏黃的街燈下，既有點暗沉，又帶着浪漫
如果帶追緊嘅女仔嚟同佢影番幾張靚相俾佢po IG，無可能唔得米啦!
當然首要你識影相啦，呢個技能真係好重要㗎……….
離開前，可以沿樓梯上番干德道~
第一棟大廈的停車場可以從高處影到這裏複雜的道路架構，都算唔錯呀~
走嗰陣可以原路返落聖母無原罪主教座堂，夜景仲似歐洲呀……..
如果大家覺得仲未夠喉嘅，可以去埋旁邊的動植物公園同落一條路就到嘅大館暢遊tim~
不過呢啲 common嘢唔使講大家都識做啦~
最後例牌補充少少~
己連拿利最大好處係唔使理會天氣，一樣都可以影得非常有特色! 最啱天陰落雨時唔知去邊拍拖嘅情侶~
附近最近嘅洗手間都要落返堅道，記得釋放好自己先出發呀
當日所見嘅毛孩幾乎隻隻都定春咁大，怕狗人士要注意呀~
好今次講到呢度~下次又有咩香港古怪地點同大家一齊發掘下呢？
我都唔知呀!!
圖文經 鋒加西亞 – 德國工作假期後的世界流浪 授權轉載
Facebook：https://www.facebook.com/Garcia.in.Germany
Instagram ：fung_garcia_backpacker