| 地址 | 新界元朗牛潭尾路攸潭美村 |
由於疫情關係，我帶住兩兄弟出去都會選擇到戶外。新年前，趁住爸爸平日放假，又有好天氣。 就帶兩兄弟遠離市區，去咗呢個有罕有溫室離地式種植士多啤梨嘅農莊，比Alfred摘士多啤梨摘個夠！
我哋於2020年年頭曾去過沖繩嘅溫室士多啤梨園，體驗過一次離地式採摘士多啤梨，發現高架栽培離地，士多啤梨全部懸掛在高架外，比起種植地下嘅士多啤梨更為乾淨，而且大家都唔洗踎底，就可以舒舒服服採摘。
▲攝於沖繩溫室士多啤梨園
估唔到，我哋幾年前去過嘅元朗農樂營都有採用呢種高架離地去栽培士多啤梨。以香港嚟講，真係較為罕有同小見！
呢度只有一個種植士多啤梨嘅溫室館，面積不算好大，大約只有8-10排士多啤梨可供採摘。另外，為保持有足夠數量比大家採摘，設立人數限制及只於星期五、六及日開放，而且採用會員制入場（登記做會員為$100），所以請大家務必預約呀！！
呢度係以自助形式採摘，進入溫室後，先要去聽聽職員教大家點樣去剪士多啤梨而又唔傷害到啲果肉，然後再去拎較剪同揀果盒（共有一大一細嘅size），售價分別為：大盒以磅計算，$120磅 / 細盒$60盒（會員價）。
我哋當日星期日下午時間到達，慶幸仲有唔少又紅又大嘅士多啤梨。
就算我孭住弟弟，都可以輕輕鬆鬆去摘下心頭好。而且士多啤梨果實都跟泥土隔開，感覺更為乾淨企理。
至於Alfred呢？佢係唔洗踎底嘅情況下，摘得更為爽快！
我哋好快就摘滿一盒大SIZE 嘅士多啤梨啦！
呢度除咗有溫室士多啤梨園摘，隔離仲有另一個溫室係種植水耕菜，大家都可以即場選購。
▲相片來自農樂營專頁
▲相片來自農樂營專頁
另外，佢哋農莊約數分鐘車程，亦有養殖寶石魚，魚場比我想像中大，我同爸爸就聽導賞員講解養殖寶石魚的原理，而小朋友則係魚場餵魚，佢見到好多魚，就已經好開心啦！ 
呢度，亦可以即場購買寶石魚，因我哋無買，所以都唔清楚價錢。如有大家有興趣，可以直接同導賞員查詢。
最後，其實呢度有唔小影相位，又可以玩露面camping 同租partyroom玩，不過都要提提大家，場地暫有工地維修，大家都要注意安全呀！
總結：雖然場內暫未有開放任何兒童玩樂設施，但對於鍾意士多啤梨嘅我，我被呢度嘅罕有離地式溫室而吸引我前嚟摘士多啤梨。同埋，疫情期間，我比較顧慮人數問題，所以呢度限制人數出入，我玩得都比較安心！
========================================
農樂營
地址：新界元朗牛潭尾路攸潭美村
營業日期：暫只有星期五、六及日開放 (會員制，必須預約）
會員費用：$100
電話：5116 9460
車位：非常有限，先到先得
交通：在元朗開心廣埸後，福康街小巴總站搭#37綠色小巴，總站攸潭尾村公所落車，步行約100米（約2-3分鐘左右）便到。
＊＊溫韾提示＊＊
1. 溫室溫度比較熱，請多補充水份。
2. 戶外地方，請做好防曬及防蚊措施。
3. 疫情緩和都唔可以鬆懈，記得常戴口罩及勤手洗/搓手，勿摸眼、口、鼻。
========================================
（以上資料更新至撰文當日）
聯絡電郵： alfredbb325@gmail.com
最近開始玩IG，歡迎追縱：allaboutalfred
最近開始玩MeWe，歡迎追縱： https://mewe.com/p/AllAboutAlfred/
追踪更多育兒生活分享，請按 Alfred 成長日記
作者﹕Alfred 媽媽
其他文章﹕