| 地址 | 香港山頂 |
| 日期 | 全年適用 |
上次講到係半山的纜車Cafe食Lunch，大人小朋友都覺得好開心！食飽飽後我哋一家就出發去山頂玩喇！
Aidan第一次坐山頂纜車，佢全程都好好奇又興奮，係咁問點解架纜車會咁斜，覺得好得意。
我同老公好多年無上山頂玩喇，而家裝修好，又無咁多遊客，真係行得好舒服。估唔到而家山頂多咗咁多野睇，慢慢行，都可以玩足大半日。
另外，最近山頂做緊「送鼠迎牛」新春優惠，只要你係屬鼠或屬牛的朋友，由即日起至3月14日，只要出示身分證就可以用優惠價$28換購山頂纜車摩天套票。
我同老公咁啱可以用到優惠（年齡唔係秘密咩>.<），只要$28就可以來回坐到山頂纜車，仲有摩天台入場券和商店的優惠券。
而Aidan夠3歲都需要買纜車票，只要讚好指定社交平台都可以有88折，兩個優惠都好抵呀！
我哋第一站當然要去睇靚景先啦！山頂纜車套票送咗凌霄閣摩天台428 的入場券，可以喺香港最高的360度觀景台飽覽醉人的香港靚景，一上到去真係俾眼前的靚景嚇親，勁壯觀呀！我哋仲係「摩天許願台」掛上祝福牌子，祈求新一年大家都要身體健康！
睇完靚景就落一樓的「搞錯3D藝趣坊」，呢個展區係免費入場的，但而家有人流管制，所以都需要排隊等入場。入面設置了好多有趣的3D拍攝場景，影得靚唔靚就考你創意喇！哥哥好攪笑，估唔到佢會咁投入，有啲都扮得幾似，哈哈。場內有3個專區係有攝影師教你攞pose影相，相片係需要加錢買的，慳家的媽媽睇咗當買咗！
山頂廣場入口有間好大的糖果店Candylicious，仲設有小朋友的購物車，哥哥入到去開心到飛起，因為有好多加大版糖果和特色朱古力，我哋俾哥哥自己揀一份禮物，佢真係好認真去揀，最後揀咗盒朱古力自己去俾錢。
行到攰當然要去DONKI買啲日本街頭小食醫肚啦！山頂廣場的DONKI以日本屋台文化為主題，入面設有25個美食攤位，真係花多眼亂，樣樣都好想食呀！揀好俾咗錢就可以去室外揾位坐低慢慢食喇！
食飽飽再周圍行下，成個商場都有好多唔同的打卡影相位，值得去探索下呀！
下次我哋會預埋時間去山頂遊樂場和大草地玩，之前去過影相都好靚，兩兄弟應該都會好鍾意。
回程喇，下次再上山頂玩啦~~
—————————————
歡迎連絡安妮媽媽：
Facebook專頁： 安妮媽媽親子日記
IG: @Annie_mama_diary | 安妮媽媽親子日記
E-mail : AnnieMamaDiary@gmail.com
作者﹕安妮媽媽親子日記
其他文章﹕