地址 | 香港仔 |
日期 | 全年適用 |
隨意踏進這扇門,
讓理想得到夢變真,
喺香港賞櫻不再是夢想。
上星期日我哋去咗將軍澳睇吉野櫻,今個星期日我哋去咗爸爸兒時居住嘅漁港睇八重櫻。(其實真係好多地方想去,但一星期先得一日可以全家郊遊。)
越過鐵路和郊野,
轉眼再現夢快車。
我哋搭港鐵到利東站,然後喺A1出口出,過馬路直行到海濱。到達海濱後,記得要轉右行啊,向左行係去風之塔 ,但賞櫻之地唔係喺風之塔,好多人都誤會咗係鴨脷洲風之塔公園嘅風之塔隔離。
向右直行,經過洪聖古廟 ,再行前少少就會見到香港花奔展覽 2021年南區園圃 ,以八重櫻為主題,配以白色燈塔 ,其實沒有日本味,反而有點漁港特色。
每節觀賞時間為15分鐘。我哋10:25a.m.才到達(之前花咗些時間找位置,因有些網上資料沒有詳細講清楚確實地址)。
門外有時間表顯示所排嘅觀賞時段,我哋排緊10:40-10:55時段,等咗15分鐘左右。(家長最好帶備圖書俾小朋友排隊時睇,如果冇野做,要小朋友企15分鐘都幾難過。)
匯報一下入場真實情況先~
21/3(日)當日嘅櫻花已經係水尾~
有十棵左右嘅櫻花樹,但只有中央幾棵係盛放,其他嘅都開始花落。
雖然分時段進場,但同一時段內都幾多人,而且個個集中喺中央盛放果幾棵樹下影相,都好難影到靚相。(我諗除非平日或最早時段去才較少人)
所以期望唔好過高。
其實打卡主要都係滿足大家嘅願望。小朋友只係想玩嘅多,不斷問我幾時可以坐船。又或者如果家裏有小朋友相機,可以帶埋去,俾小朋友影吓相,冇咁悶嘛。(當日阿囝攞咗我部手機影相打發時間)
滿足完大人,梗係要安排吓點先滿足到小朋友呢~
1) 洪聖古廟之貓咪
隔離洪聖古廟充滿特色,亦係香港法定古蹟,可以順路去參觀吓。但小朋友對廟內嘅貓咪更感興趣。(提醒小朋友要愛護動物)
2) 洪聖街休憩花園
有些漁船和龍舟模型供打卡,連櫈都係龍舟樣,小朋友會覺得好得意。
3) 鴨脷洲海濱公園
有花有草,長廊平坦,小朋友又能跑跑放電。(唔好睇少跑,香港冇乜地方可以俾小朋友任意去跑,係學校跑,老師一定會唔俾,叫佢哋慢慢行。所以小朋友有得跑就已經好開心)風之塔內正進行工程,未能開放,希望將來有機會去睇吓啦。
4) 鴨脷洲至香港仔街渡
小朋友見到船船已經好高興。平時搭嘅都係大型船,真係未試過搭這類小型船。未搭先興奮,全程非常enjoy。(好似玩咗轉樂園玩機動遊戲咁)
留意街渡分兩架:一架去香港仔中心魚市場附近;另一架去巴士總站附近。
5) 海鮮市場
喺香港仔街渡碼頭隔離有些海鮮市場,售賣各類乾貨和濕貨。小朋友平日好少去街市,見到魚和龍蝦等海鮮又覺得好有趣。
走過時光隧道
坐時光機
6) 香港仔海濱公園
喺鴨脷洲海濱公園對面就係香港仔海濱公園。小朋友除咗可以狂跑外,沿路仲有富有漁港特色嘅雕像、畫牆和另一款龍舟,了解以前漁民嘅生活。另外,仲有介紹香港島南區嘅歷史、文化和旅遊嘅小白屋。由叮噹爸爸負責講解,我哋好似坐咗時光機返咗去過去了解南區歷史咁。
7) 懷舊麵包店
之後叮噹爸爸繼續帶我哋遊香港仔﹗因為佢真係地膽,兒時長大嘅地方嘛。帶咗我哋去懷舊麵包店, 童年回憶返晒嚟。光酥餅、椰堆仔 、 摩囉酥和香蕉糕等,真係好耐冇食過,依家好少地方仲賣緊傳統鄉土小食。孖寶從未食過,食完覺得好滋味啊。
8) 香港仔天后古廟
古廟係三級歷史建築,由漁民集資於清朝咸豐元年(1851年)建成,係香港開埠後較早建成嘅中式廟宇。內裏保存了不少清朝文物,包括鑄於咸豐元年(1857)嘅古鐘。
最後叮噹爸爸帶我哋行埋佢以前嘅舊居和幼稚園與小學,我哋就完成了時光旅程。
後記﹕
1.櫻花樹嘅數目算多,可惜已過盛放期。而且人好多,想盡情咁影相打卡似乎有點困難。
2.小朋友對於咁多人嘅打卡點沒太大興趣,所以千祈唔好只去打卡,順路跟住玩,小朋友應該都會玩得開心。
3.我哋冇去食傳統艇仔粉,因帶住小朋友唔太方便。所以我哋係鴨脷洲一間台式食店食午餐。食物和飲品味道十分之好,而且價錢平民化。
4.如果小朋友年幼,要坐bb車,其實都適合去今次嘅行程。之前搭船都見到有媽媽帶bb車上船。只係要多一個人幫手抬bb車上船,另一人就抱住bb。
5.另外,香港仔地域多馬路,而且行人路窄,小心看顧小朋友。推bb車就不太適合行入城市,可能留喺海濱公園玩會較好。
歡迎讚好專頁得到更多免費資訊,更快緊貼我們的最近動態
~Facebook page:
https://www.facebook.com/Miss.swanswan
~Instagram: (更多孖寶和孖媽的生活趣事)
https://www.instagram.com/little_twin_stars82
#親子活動 #假日好去處 #kidslife, #hkmomlife, #hkblogger, #hkmum, #香港遊 #本港遊 #我愛香港 #親子行山 #放電好去處
作者:龍鳳孖媽
其他文章﹕