又到小朋友最愛嘅暑假啦！呢個暑假，我都同Alfred plan 咗好多節目同活動，而其中一個就係去Staycation享受親子度假時光啦！
我哋打響頭炮嘅第一個StayCation就係揀咗尖沙咀旺區嘅精品酒店「帝樂文娜公館」啦，原因係佢哋暑假期間呢有個以親子為主嘅「Be a Dreamer 小小夢想家」住宿package，其中一個專享禮遇非常吸引我，就係長達30小時住宿體驗及保證玩到至少3項活動，超抵玩！！！
「Be a Dreamer小小夢想家」住宿優惠入住日期為2021年7月1日至8月31日。而價錢亦算抵玩，就好似以我為例，我哋星期六入住定價每晚為$1,188起，並贈送$800餐飲消費額，可於入住期間到酒店餐廳FINDS及酒吧Dada Bar + Lounge使用。如果係星期日至五入住嘅話，價錢仲抵，只需每晚$988咋。以暑假嚟講，真心相當划算！
專享禮遇：
簡單介紹咗「Be a Dreamer小小夢想家」嘅住宿package小小資料後，就開始正式分享我哋今次入住嘅真實體驗啦（圖文並茂比較多，因為都想比大家知道真實情況）。
酒店位於尖沙咀旺區，所以我哋當日決定唔揸車，就算我哋拎住兩個背囊同孭住弟弟都唔覺得特別辛苦，因為酒店離尖沙咀地鐵站B2出口都係大約5分鐘路程，非常方便！
至於酒店大堂唔算好大（始終係精品酒店），不過設計風格我就覺得好特別，比到我哋一種型格嘅感覺，因為酒店係以「超現實主義」為設計概念，有別於其他一般酒店，每一處都有細節位同影相位，而且亦充滿藝術文藝氣息！
▲好多打卡影相位
▲酒店都有做足防疫措施
而當日我哋準時12點Check-in嘅時候，同埸亦見到有其他家庭辦理緊入住手續，雖然有其他家庭，但等候時間都好快，我哋當日前後等咗大約5分鐘就成功Check-in 左啦！
▲Check-in 時酒店提供一本「探索護照」
▲「探索護照」內裡有活動日程時間表及其他實用資訊
▲Check-in 時酒店提供比兒童嘅個人清潔護理套裝
▲兒童個人清潔護理套裝 ，包括有：沖涼液、洗頭水及潤膚露
房間環境及設施：
呢間就係我哋住嘅房間，一入房內行多幾步就見到有個小帳篷同小裝飾，小朋友就最開心。而且房間整體乾淨企理，空間感都夠大，就算我哋一家四口入住，同酒店要求加多張ＢＢ床都仲好闊落。除左好似我哋揀Twin Bed之外，客人亦可以要求King Size床~
▲入住前可預先要求酒店安排BB床
▲房間有USB Port，充電好方便
▲房內有小雪櫃（親切提示：此圖片內飲品係要額外收費）
▲親切提示：此圖片內飲品及食品係要額外收費
至於浴室，設計係走型格風，基本設施同用品都有齊。不過呢個package只係免費升級至尊尚客房，如想浴室有浴缸嘅話，就需要另外再升級至豪華 (Deluxe) 客房了 (註：最好預訂時提出，而酒店會視乎供應而定）。
分享完房間設備後，就到我哋最期待嘅「Be a Dreamer小小夢想家」嘅活動啦！呢個package最吸引我哋係保證可以玩到至少３個活動，所以喺Check-in 嘅時候，我都把握機會預約左好幾個活動！實行大玩特玩（玩盡佢）！除左保證玩到嗰3個活動外，我哋都好順利咁預約到額外多3個活動，即我哋參加咗6個活動咁多。哈哈！包括：小小廚師、小小調酒師、小小管家、毛巾藝術教室、小小實驗家及繪本共讀，仲參加埋佢哋每日都有嘅超現實遊蹤添！！！
小小廚師（個人推薦必玩）
呢個小小廚師嘅活動，係喺酒店入面嘅FINDS餐廳進行。小朋友們可以換上專業嘅廚師服飾朋同戴上廚師帽，搓下預先準備好嘅麵團，而小朋友就可以按自己口味加上自己鍾意嘅配料。完成後，小朋友仲有張證書同可以品嚐返自己整嘅Pizza添！
▲如整野食／飲品嘅活動，酒店都會要小朋友們洗手及消毒雙手，讚！
▲完成後，大約拎去焗10分鐘左右就可以食得
▲小朋友仲有張參與證書
▲有得玩又有得食，最開心係佢啦
小小調酒師（個人推薦必玩）
呢個活動都係喺酒店入面嘅FINDS餐廳進行，同樣需要換上制服。小朋友跟住FINDS餐廳專業嘅調酒師講解每個調酒步驟，個個都做得有板有眼呀。完成後，小朋友亦都有張證書同飲返自己沖完杯飲品！
小小管家
比小朋友體驗一下執房間嘅工作！一間混亂嘅房間，就要靠小小管家還原整理返。唔好睇小每個細節呀，因為Alfred執完後都覺得呢個工作絕對唔輕鬆呀！哈～
▲小小管家都有制服著呀！
▲每個工序都要一絲不苟呀！
毛巾藝術教室
平時去酒店住見到用毛巾整嘅公仔／動物好得意，估唔到係呢度都可以學到／玩到！呢個毛巾藝術教室活動，小朋友可以揀整3款造型，而小朋友最後仲可以拎走其中一款添。
小小實驗家
小小實驗家呢個活動係酒店聯同科學機構「Little Scientist 小小科學超人」合辦嘅科學探索STEM工作坊，課堂入面可以比小朋友學下唔同嘅實驗室嘅工具、用品。仲以遊戲方式，比小朋友認識唔同嘅恐龍同其特性。最後，小朋友仲可以落手落腳去鑿恐龍化石添。
**報讀小小科學超人優惠**
凡持有帝樂文娜公館 THE LUXE MANOR 收據（2021/7/1 – 2021/8/31），可以享有以下優惠：
*優惠碼*：LSE
初級科學家：（新生）可享買一送一workshop 優惠（只限一堂）
資深科學家：（舊生） 報讀任何恒常班額外多送2堂或送2堂workshop
https://www.facebook.com/littlescientistsdpark
註：是次優惠只限荃灣D．Park基地。
繪本共讀
呢個活動係喺親子遊樂園 嘅遊戲室進行，如果鍾意聽故事嘅小朋友唔好錯過啦！
除此之外，其實喺酒店大堂都有「童書入酒店」呢個活動，小朋友可以喺住宿期間去借閱唔同嘅精選繪本，呢度Ｄ繪本係由「綠腳丫親子讀書會」創辦人Kenny同其團隊親自挑選呀！
超現實遊蹤
至於呢個活動就好似玩緊尋寶遊戲咁，喺大堂集合後，就可以跟住酒店職員去做一啲小任務，每個任務都同超現實主義嘅概念同相關嘅著名藝術家，非常特別。當然，完成任務後，小朋友可以換取精美禮品呀！
▲見到花灑頭嗎？
除咗以上好玩嘅活動外，酒店亦有一間「HAPE遊歷家親子遊樂園 」嘅遊戲室。顧名思義就係酒店聯同著名德國木製玩具品牌HAPE打造嘅室內遊戲室，入面提供一系列以FSC認證嘅天然實木同天然無毒無味顏料製造嘅玩具。仲有唔同音樂系列、角色扮演玩具、火車拼砌同STEM等嘅優質玩具。
酒店餐飲
每房每晚贈送港幣800元餐飲消費額，雖然唔夠我哋2大2細大食一家去享用晚餐，不過我覺得呢度嘅食物質素絕對值得比多小小嚟消費。特別係佢哋嘅兒童餐，係由餐廳FINDS x Done by Deer嘅兒童套餐，除左有主菜揀外，亦有自家製雪糕伴新鮮雜果同果汁，好高質！
▲（圖上）香煎挪威三文魚柳，香口肉嫩滑，推薦！
▲自家製牛肉及豬肉肉丸，哥哥食到唔停口，所以我都唔太清楚個味道…
▲頭盤之一：北歐蟹肉餅
▲頭盤之一： 煙薰烤美國牛柳
▲香烤龍蝦三文魚湯，香濃美味
▲是日精選甜品
而第二日，我哋都選擇係去酒店餐廳進食。份量足夠款式又夠多，我覺得味道仲唔錯添！
▲兒童版All Day Breakfast
**升級優惠**
如果有預算嘅話，更可以揀佢哋嘅升級服務，就係分別以充滿中東情懷嘅「SAFARI」同北歐冰雪世界為題嘅「NORDIC」嘅主題套房啦！
▲中東情懷嘅「SAFARI」主題套房
▲酒店亦提供咗特色嘅服裝於房內，讓客人作主題攝影之用
▲北歐冰雪世界為題嘅「NORDIC」主題套房
而家可享優惠價$2,988元(房價原價為港幣5,880元)，入住上述升級主題套房，除咗可享受「Be a Dreamer小小夢想家」住宿假期嘅禮遇外，更可獲贈免費早餐予最多兩位大人及兩位小朋友享用。真心抵玩！
最後不得不提，呢度竟然有一間同客房一樣咁大嘅哺乳室，正！對於我兩胎都係母乳餵哺，我真心欣賞，因為房間除咗夠大外，入面亦提供一系列相關配套如尿片更換墊、暖奶器、奶樽消毒器同衞生消毒用品等，仲有方便餵奶嘅armchair… 真心讚呀！！
總結：對於第一次喺香港住精品酒店嘅我哋嚟講，呢度無論服務、住宿、食物質素及親子友善度都比我想像中要好。而呢個套票長達30小時住宿體驗及保證玩到至少3項活動（我哋最後玩咗6項，記得check-in 時立即預約活動呀！因為每個活動都有限人數，確保質素，而且部分熱門活動好搶手呀！）。整體性價比超高！真心值得推薦比大家！
快速訂房：https://bit.ly/3qDCACn
==========================================
【帝樂文娜公館@尖沙咀】
地址：香港九龍尖沙咀金巴利道39號帝樂文娜公館
電話：(852) 3763 8888
電郵：[email protected]
網址：https://www.theluxemanor.com/
Facebook：https://www.facebook.com/theluxemanor/
Instagram：http://www.instagram.com/theluxemanorhk
==========================================
（以上資料更新至撰文當日）
聯絡電郵： [email protected]
最近開始玩IG，歡迎追縱：allaboutalfred
最近開始玩MeWe，歡迎追縱： https://mewe.com/p/AllAboutAlfred/
作者：Alfred 媽媽