| 日期 | 全年適用 |
筆者今日要介紹一條小綠洲路線俾大家，絕對適合大家輕輕鬆鬆一天遊。
希望大家仲會期待筆者嘅好介紹，您嘅小小支持，絕對對筆者係一個大大嘅推動力。
事不宜遲，今次筆者帶大家去嘅地方係一個有景有山有水，影相既好地方。
呢個地方就係大嶼山嘅貝澳，我哋講明會上山下海，所以今次我哋會經貝澳，再上老人山上面睇風景。
而今次嘅行山路線都需要一定嘅體力，但放心，呢度絕對唔會比上大東山辛苦。
都係個句，要有收獲，一定要付出小小嘅汗水嘅。
今次嘅行山路線：貝澳 – 芝麻灣懲教所 – 拾塱水塘 – 老人山 – 貝澳
今次筆者大約用咗 5 個鐘到，已包影相、休息等等。
我哋今次會喺東涌搭 3M 喺新圍村度落。
如果怕落錯車，可以叫司機提一提您。
一落車已經有個公廁等緊您，記住記住去定先，因為一陣過埋貝澳海灘就無廁所俾您去。
因為今次嘅行山徑係無食物補給，建議大家要帶足夠嘅水同乾糧。
又或者係喺貝澳，沿住車站向前行，應該會見到士多、茶餐廳等等，醫咗個肚先。
好，跟住您喺車站過對面馬路，有一個分叉路，沿住右手邊一直向前行。
行大約10分鐘到，貝澳沙灘絕對出現喺您眼前。
貝澳沙灘嘅特色絕對係一條條沙既坑紋。
嚟到絕對要影大合照啦。
留意喺沙灘嘅附近有一幅塗鴉牆俾大家影下相，大家又可以成班人好似筆者咁扮下英文字。
感謝筆者去行嗰日好好天，啲雲海亦都好靚。
沿住海灘一直行，您會經過露營區。
最之後係要澗少少水，筆者就提提大家記往除鞋同襪去感受下啲水有幾清。
您會覺得呢度真係好似墾丁，完全唔似香港。
嗱，筆者都玩咗好一陣子。
玩完先慢慢抹乾。
再一直行，會見到呢個路牌。
其實沿路無太多分叉路。
一路行您會發現會經過芝麻灣郊遊徑，但緊記，我地會行左手邊上山，走先會由芝麻灣郊遊徑走。
一路行您會見到興建中嘅住宅，呢度就係拾塱新村。
呢度嘅景色亦好靚。
再一直行會見到芝麻灣懲教所。
一路沿住芝麻灣懲教所向前行。
您會發現有一條小秘道，可以穿過懲教所。首先往樓梯向上行。
穿過之後您會見到您已經進入芝麻灣段。
一路行，您會發現有路牌指您向龍尾行。
途中會經過拾塱水塘，呢度亦十分適合影相。
好，行山之旅正式開始。
放心沿途會有指示牌話您知點行。
由拾塱水塘行去龍尾大約要45分鐘。
講明龍尾，咁梗係真係有條尾。
之後大約會見到以下咁嘅山路。
放心不太難行，只是需要一般體力。
大約行了 50 分鐘到，就會到達老人山山頂。
老人山高 303 米，上面有一片草地俾大家作息。
亦有一個山火瞭望台，有職員駐守。
行山遇到好天氣絕對係開心嘅事。
之後其實老人山仲有另一座無名山峰，大約由老人山行大約40 分鐘左右，當風處可以觀賞整個貝澳海灘。
對面就係大東山啦。
最後行咗大約30分鐘嘅沙石路，記住，沙石路比較滑，所以一定要慢慢行，便到達了之前講嘅芝麻灣郊遊徑出口。
再沿住之前嘅路就可以出番貝澳，如果甘啱撞正太陽落山時分，可以喺貝澳海灘欣賞埋日落先走。
希望您哋可以抽多一點點嘅時間去接觸香港嘅美，去感受，去和身邊嘅朋友同另一半好好去分享，不要只用嘴巴去珍惜。
作者：LKY的慢活生活