西貢泥涌︱大海、夕陽與天空之鏡


全年適用

有啲嘢細個唔識珍惜,到大個先會知佢嘅寶貴之處

呢個道理多數apply喺中學時追女仔,估唔到我竟然應用到落「泥涌」呢度!

鬼咩~ 住沙田嘅我,中學時代喺泥涌都唔知留咗幾多腳毛

記憶中只係成班佬無女仔嘅BBQ又熱又悶,仲要個個窮苦學生,唔知邊條粉腸帶路由馬鞍山新港城行入去…….

哎呀前言又太長tim~

總之廿幾年後的現在重臨舊地才發現,泥涌竟然係一個擁有極美自然風光,並且超方便到訪的小郊遊地點~ 仲一次過有齊大海、夕陽與天空之鏡美景!

點解我蒲咗沙田30幾年,而家先知有個咁好嘅地方就係左近呢……..

文章概要:
– 交通
– 平坦小路
– 大叔的碼頭
– 石灘攝影
– 殘橋與泥漿
– 泥涌日落

交通

話就話「泥涌」屬於西貢區,但根本就係烏溪沙不遠處,多數沙田人(至少我係)都當咗佢係馬鞍山的一部分

交通方面,幾乎所有由新界東入西貢的車都會經過,即可於沙田市中心坐299X
而家屯馬線開通咁興奮,更加可以坐到總站烏溪沙才轉乘99號巴士,會平過係馬鞍山站上車的~
另外泥涌巴士站做緊工程以致非常唔顯眼,小心錯過!

落車後按指示行入去,見到舊巴士站位繼續直行

係下圖果個位行落去就係泥涌了~

烏溪沙巴士坐5分鐘,落車又行5分鐘,即係唔使4個杯麵的時間就到達郊遊風景位 (點解聽落好似好耐嘅?),會唔會太過方便?~

平坦小路

斜路一落,入目已是一片非常廣闊的泥石灘~ 好靚呀~

面對咁靚嘅風景,係好應該立即飛撲落去全身暑假投奔初夏~

但我只非常冷靜地喺上圖呢個角度猛咁影

梗係啦…….外面34度酷熱警告,我企呢度就涼風樹蔭,點會想郁……..

其實諗真啲,明明泥同石都唔係咩乾淨嘢,點解呢度會咁有feel 嘅? 唔通真係藍天白雲加持下全部upgrade 50%?

終於俾蚊蠓咬到侷住要走……..

沿路前行可以睇到大石灘的不同面貌,一啲都唔覺得悶~

大叔的碼頭

行不夠10分鐘,已到達盡頭泥涌碼頭~

上網睇其他介紹相果陣,碼頭係空無一人任影唔嬲,誰不知我當日一大班「黑古luc掘」大叔一字型坐晒喺度

潛意識成班阿叔聚埋,一定黃賭毒是但衰一瓣唔慌好嘢!

喂再睇真啲——成班麻甩大叔喺度放風箏 !!!???

再仔細聽佢哋高談闊論,原來係自己友圍內鬥風箏,玩法似乎係邊個界刂斷晒其他風箏就算贏!?
成班男人界刂女見得多,風箏我都係第一次見……. 點解啲活動咁健康嘅,個feel好唔match ar……….

不過當我由下方影上去,一班風箏佬成張哪些年poster咁,又真係陽光青春咗wor~

石灘攝影

係時候落石灘影下相啦~

呢度就無咩好講了,始終我影相都係弱雞,大把師兄俾我更識囉角落搵靚位~

只係想提提大家,7月盛夏,起碼下晝5點後先會嘅有陽光又無咁曬~

對我嚟講,呢個時間啱啱好,起碼唔會變燒豬先~

對鞋夠勁又或似我著cross嘅更加一流,可以行落水或涉水去唔同地方地形海邊影相~
赤腳得唔得?

當然無問題啦~ 但首先你要有石舂路跑步唔慘叫嘅能力~

殘橋與泥漿

影完石灘,可以過返殘橋果邊影相啦~

話晒都係泥涌的標誌,所以大部分人都會湧晒去橋度影相,甚至會有啲大媽影足兩粒鐘阻住晒

都係果句,唔係唔俾妳影,但唔好當自己買咗呢度死霸住啲位先得ga,入晒鏡ga!

新垣結衣就話無問題je,妳哋係屯門阿姨咋,理下其他人感受啦唔該

唉,睇嚟要認真練下photoshop了………

另外,如果要上橋,我建議正正經經由橋尾上去

因為若似我咁想打橫剷過去,斷橋兩旁全是輕軟污泥,我一踩就沉到落小腿,十足盜墓迷城沉落啲浮沙咁!
而且啲泥會完全吸實對腳,超極難拔番個人出嚟,一個唔該向前仆嘅,包妳立即變周星馳!

泥涌日落

江湖傳聞如果啱時間,泥涌係影天空之鏡的好地方~
我相信應該係得嘅~ 只係可惜我到訪當日水唔算多,只能影到部分鏡面,但已經好滿足啦!

近日落時分,喺殘橋係某啲角度仲可以影到兩個太陽tim~

喺殘橋見太陽入山後唔好走住,快啲行返去碼頭果邊!

因為 ———- 好大個鹹蛋黃呀!!!!!!!!

痴線ga!

泥涌呢度,唔單止有齊斷橋清水綠草等等美景構圖原素,仲有環山海景、天空之鏡與黃金夕陽,所有嘢都只係離市區10零分鐘路程,會唔會太得天獨厚呀!
學生時代唔識佢有幾好,而家俾我發現後,睇怕都有round 2 round 3 round無限了~

希望唔會又極速俾人群攻陷啦~

好~ 最後係注意事項~

-如果唔計行落泥灘,由巴士站至風箏碼頭的道路完全平坦,連輪椅人士都能應付自如~
-唔好著普通拖鞋,泥灘亂石非常刮腳,如果不幸如我沉落泥中對鞋一定無硬! 建議著番啲防水力強或水上運動專用鞋,女仔想影相靚靚,就到時先換鞋啦~
– 近碼頭有公廁,但無士多,記得帶多啲水呀~

圖文經 鋒加西亞 – 德國工作假期後的世界流浪 授權轉載
Facebook:https://www.facebook.com/Garcia.in.Germany
Instagram :fung_garcia_backpacker

 

其他閱讀:

親子行山 |香港15大親子行山路線 與孩子來一場秋季之行


熱門文章

召集親子餅印照片.展示最強DNA | 入選100強即獲精彩禮品
媽媽谷 | 免費加入Ohpama WhatsApp group獲得最新資訊 著數優惠
復活節海外玩2024|17大復活節好去處 日韓賞櫻/大阪環球影城復活節慶典限定/特色室內遊樂場
運動嘉年華 3月限定免費入場 5大運動體驗區 +近距離接觸香港運動員+免費換領紀念品
送《劇場版 角落小夥伴 奇幻的玩具工廠》電影換票證 | 展開奇幻探險之旅

全港最大戶外 電動車 場 「拖頭」/工程車/掘泥車/飄移賽車/警察電單車 3歲就可以玩|初初媽媽
中環海濱變220米藝術長廊 免費打卡︱復活節好去處
精選13大郊遊野餐好去處
昂坪360 復活節尋蛋派對 人氣插畫角色「好想兔」首次跳入香港
復活節本地遊2024 |24大好去處推介 復活節嘉年華/親子田徑比賽/復活蛋工作坊/室內遊樂場快閃優惠
藝術維港2024︱teamLab 發光蛋 首星期預約已滿額 呢個日子開始有即日預留名額! 附預約連結
查看更多   ▸