親子Staycation︱迪士尼樂園酒店。住進夢想的奇妙世界︱安妮媽媽親子日記


Aidan勁期待的「迪士尼樂園酒店」Staycations出發喇!佢真係講咗好耐,成日睇番d相都話好掛住,想再去渡假游水,終於等到學校假期可以去玩番兩日了! 

我哋好早就到達酒店,以為要check in後先可以book到游水,但原來喺平日的時間,泳池唔使預約,walk in就可以,好開心。(星期六,日及公眾假期就需要提前預約,每房可以book兩節,先到先得。)

酒店房間有兩張雙人牀,有露台,乾淨舒服。

首先去玩的就係大家都好熟悉的「迷宮花園」,兩兄弟係入面揾路出番嚟都玩咗半個鐘,弟弟一入去就見唔到佢個頭頂,好搞笑。

 

行前少少有個「室外兒童遊樂場」,有城堡造型的遊戲設施,有兩組滑梯,有小型攀爬,又有傳聲筒,好啱小朋友放電。但下午時段太陽會曬正公園,滑梯會好燙手,要小心注意。

 

每日2點半開始至5點,多用途球場旁有「腳踏高卡車體驗」,場內有一個大的橢圓形賽道,小朋友可以踩高卡車,哥哥玩咗好多次呢!

3點至6點多用途球場就有「迪士尼樂繽紛」,會開放俾住客玩,場內有多組滑梯,也有飛碟,拋波波,滑板車,平衡橋和小型過山車等。中間的位置有得畫畫,有提供迪士尼卡通人物的畫紙和顏色筆。
( 但由於天氣實在太熱和太猛太陽,我哋都係逗留咗一陣就離開了。)

今次想特別推介「高爾夫球體驗」,平日入住可以免費試玩一小時,只要提前預約就可以玩,兩個場地各有不同的賽道,對小朋友來講都幾新穎。哥爾夫球套裝內有兩支球桿,計分紙,兩樽水,蚊怕水和兩個哥爾夫球,用個野餐籃裝住,好似真係去咗比賽場地一樣。(星期六,日及公眾假期試玩要付$280)
( 記住要做足防蚊措施呀,室外地方有好多蚊!)

酒店的室內遊戲室「童話世界」雖然地方唔大,又無滑梯,但就有好多靜態的玩具玩,好適合幼童。

「童話世界」的設計好有迪士尼的氣氛,一入去就好似置身係童話裏的森林一樣。兩個玩具櫃上放滿迪士尼卡通公仔,故事書,益智玩具,仲有美國隊長面具和盾牌等。

有多組廚房玩具和洋娃娃屋俾小朋友玩,房間內可以拎顏色紙塗顏色和玩電子小遊戲,更有小電影可以觀賞。
( 遊戲室每40分鐘一節 )

 

Aidan今次有參加「迪士尼朋友畫室」,學畫Winnie the Pooh,跟住畫畫姐姐的指示,一筆一筆地跟着畫,畫得好可愛呀!地點係水晶吊燈樓梯下面。
(名額先到先得 )

泳池有室外和室內,所以落雨都可以游水,我哋最鍾意玩泳池的滑水梯。 

5點左右我哋就入迪士尼樂園玩一陣,傍晚時分人唔多,我哋都玩到好多個遊戲呀!食埋晚餐就慢慢散步番酒店休息。

第二日早上我哋參加了「迪士尼朋友太極班」,係酒店大堂可以同卡通人物一齊耍太極,我哋今次遇到米奇大師一齊玩,兩兄弟勁開心!雖然我哋遲咗去,名額滿咗無得入,但都可以企喺繩的外圍跟住玩架!
(名額先到先得,要預早少少落去排隊)

酒店仲可以租羽毛球、瑜伽套裝及桌上遊戲玩,可以向酒店職員查詢。

Check out後我哋再去游水,泳池旁就有更衣室和儲物櫃,好方便。仲有可以玩尋找隱藏米奇,完成答案就可以換領小禮物。

Lunch係翠樂庭餐廳食,餐廳用餐環境舒服,整間餐廳的天花佈置好多花花植物,白色的設計配上木色的餐枱,彷彿置身於宮殿花園裏面,好靚。

值得一讚的係,酒店到處都有提供蚊怕水,可以俾住客隨時拎嚟用,好貼心。

呢個假期好充實,好開心呀!影左好多靚相,期待下次!

 

—————————————

歡迎連絡安妮媽媽:

Facebook專頁: 安妮媽媽親子日記

IG: @Annie_mama_diary | 安妮媽媽親子日記

E-mail : AnnieMamaDiary@gmail.com

作者:安妮媽媽親子日記

 

其他閱讀:

親子Staycation|挪亞方舟度假酒店 輕鬆休閒的兩日一夜|安妮媽媽親子日記


熱門文章

召集親子餅印照片.展示最強DNA | 入選100強即獲精彩禮品
媽媽谷 | 免費加入Ohpama WhatsApp group獲得最新資訊 著數優惠
復活節海外玩2024|17大復活節好去處 日韓賞櫻/大阪環球影城復活節慶典限定/特色室內遊樂場
運動嘉年華 3月限定免費入場 5大運動體驗區 +近距離接觸香港運動員+免費換領紀念品
送《劇場版 角落小夥伴 奇幻的玩具工廠》電影換票證 | 展開奇幻探險之旅

送Sooper Yoo套票 | 挑戰體能+VR體驗 盡情放電
送《劇場版 角落小夥伴 奇幻的玩具工廠》電影換票證 | 展開奇幻探險之旅
送新城市廣場 x HomeSquare利是套裝 | 繩結藝術溫馨打卡賀新春
3大室內遊樂場「買一送一」暢玩2小時低至$25/位 全日適用無時段限制︱ 森林探索樂園 /躲貓貓樂園/探索家樂園
復活節好去處|iSQUARE 充氣樂園 3大吸睛玩樂區 5米闊「智脆菠蘿油迷宮」+ 4米高「 港式熱奶茶」+ 11米長巨型美食街樂園
奧海城 3,000呎吹氣尋蛋樂園 5米巨型滑梯+復活蛋波波池 每日贏取88隻 Kinder奇趣蛋
查看更多   ▸