恐龍公園 ，其實媽媽一直都想帶豬仔包去，但要行大斜路或樓梯上去，烈日當空真係有點卻步，今日難得有豬仔包舅母同行，可以揸車上去，又遇上陰天，事不宜遲，出發去揾恐龍！
其實 恐龍公園 係坪石遊樂場嘅兒童設施，以遠古恐龍時代為主題，附近有公眾停車場 ，揸車去非常方便。
我哋一落車，向前行已經遠遠望到遊樂場入口，因為個入口有大大隻恐龍牙等着張開口食我哋。行到去遊樂場，發現一個人都冇，yeah ，我哋包場可以盡情玩啦！
呢個遊樂場有好多恐龍嘅佈置，色彩繽紛嘅 恐龍 蛋化石 、恐龍骨 、大大嘅恐龍頭 、恐龍腳印同 恐龍 山洞 等等，不過豬仔包望咗兩眼，已經比其他遊樂設施吸引住。
呢個遊樂場面積好大，分成兩邊。非常多滑梯 ，亦有鞦韆、搖搖船 、攀爬架等同感官設施等。最特別係城堡滑梯有個升降機，可以俾小朋友「搭落樓」，睇落相當好玩又刺激，不過豬仔包身型細小，驚佢扶唔實跌落地，唔敢俾佢玩。
由於包場，豬仔包兩邊係咁走，超級放電 ，可惜玩咗一輪，突然落雨，我哋唯有結束呢次恐龍之旅。臨離開前，發現除咗揸車之外，仲有一架82號小巴可以直達，下次媽媽可以自己帶豬仔包去又唔使行斜路同長樓梯啦！
地址：九龍牛池灣平山彩石里
開放時間：06:00 – 23:00
圖文獲 豬仔包の開心日常 授權轉載
其他文章：
