| 日期 | 全年適用 |
政府嘅免費兒童遊戲室每一間都有唔同主題，今次 Blogger 80後爸B 帶阿寶去嘅遊戲室就用「海洋世界」做主題，阿寶仲未識游水，就率先去咗潛水！即刻睇吓有咩玩：
遊戲室用藍色做主調顏色，有海浪+海洋生物做布置，當中最吸引嘅絕對係大大架潛水艇～阿寶走出又走入，充滿好奇心！
另一邊就有座海底洞穴，上下層有繩網+ 障礙+滑梯，而且全部鋪晒軟墊，阿寶爬上爬落，放電之餘又安全。呢度仲有座海豚造型嘅細滑梯，而側邊有小山丘同埋牆面玩具，阿寶都好鍾意玩。
介紹返～呢度係調景嶺體育館兒童遊戲室，上網睇呢度好受歡迎，週末假期成日full house，今次帶阿寶平日下晝去玩，雖然每個時段有40個名額，但係預早半個鐘排隊都差啲無位。不過體育館上層都有座室外遊樂場，隔離仲有圖書館，排唔到遊戲室都唔怕無節目！
開放時間：每日09:00-21:45（有唔同時段，定期保養日暫停開放）
地址：將軍澳翠嶺路2號
交通：港鐵調景嶺站A2出口行10分鐘
入場費：免費
更多資訊：「康樂及文化事務署」網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
免費好去處 ｜衛生教育互動展館 邊玩邊學／有得打卡／拎禮物｜80後爸B
