| 日期 | 全年適用 |
呢個新開嘅 恐龍公園 足足有3.5萬呎，仲有14項玩樂設施無限時任玩，Blogger 80後爸B 就話最啱俾阿寶瘋狂 放電 ！
一入去就見到「暴龍大冒險」，可以由暴龍口爬入去，有繩網陣、吊床，仲有7米高滑梯，爸爸覺得真係好刺激呀！另一個好玩嘅係長23米「恐龍飛索」，俾小朋友有飛一般嘅體驗。
呢度啲設施啱2至12歲，所以阿寶呢個年紀都有好多嘢玩！玩完3米攀爬牆+滑梯「劍龍之谷」，再喺「腕龍森林」走嚟走去，之後再到「恐龍山丘」爬上爬落，太陽落山都唔捨得走！
介紹返～呢度係 Dino Park 恐龍公園 ，雖然場地夠大，不過玩嘅人都好多，所以入到嚟玩，有以下6大注意位：
1. 公園位於5樓，唔識路可能兜極都去唔到 ，其實只要喺港鐵沙田站A3出口去到商場中庭，搭右手邊電梯上一層，再行前少少搭另一部電梯上一層，之後推右手邊玻璃門出去就到。
2. 我哋週末過嚟要掃QR code拎籌，足足等咗成鐘，大家最好諗定拎籌後點消磨時間。
3. 公園開朝7晚10，而且無限時任玩，所以不妨早啲、晏啲去玩。
4. 飛索、鞦韆呢啲受歡迎設施，入到場要再排隊，如果爸媽同行，可以一個睇住小朋友，一個負責排隊，慳啲時間！
5. 場地全戶外，雖然有啲遮陰位，但係爸爸覺得略為唔夠，日頭去玩要做定防曬措施。
6. 呢度有免費飲水機+洗手位，玩完補水、清潔雙手都好方便。
開放時間：每日07:00-22:00
地址：沙田新城市廣場1期5樓
交通：港鐵沙田站A3出口、巴士沙田市中心站
入場費：免費
更多資訊：「沙田新城市廣場」網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
室內遊樂場 ｜免費海洋世界遊戲室 大大架潛水艇／海底洞穴繩網／滑梯｜80後爸B
