大埔好去處 ｜之前已經想帶Asher參觀元洲仔自然環境保護研究中心，呢個由世界自然基金會香港分會管理嘅中心係由前新界政務司官邸呢個法定古蹟發展而成，中心主要係舉辦各類教育活動，宣傳保育同可持續生活。
我哋今次去係參加由漁農自然護理署主辦、世界自然基金會香港分會（WWF）協辦嘅「賞．惜 海洋野生動物節」。呢個活動喺1月嘅四個週末進行，小朋友可以從活動中認識香港嘅海洋生物，同埋學習點樣擁有可持續嘅生活方式，保護海洋生態。
活動包括咗好多類型嘅節目，包括工作坊、攤位遊戲、保育專題講座同教育展覽。參加完活動之後，仲可以攞到精美紀念品㗎！活動喺1月6號開始，每個星期六同星期日都有，一直到28號。
所有攤位遊戲同教育展覽都全日開放，而部分節目包括我哋今次參加嘅「塑膠升級再造工作坊」就需要預先報名。我好鍾意今次呢個工作坊，除咗俾小朋友從中了解到塑膠污染對海洋生物嘅威脅之外，仲可以俾佢哋親身體驗塑膠回收嘅過程，了解塑膠循環嘅重要性。
除咗工作坊，仲有攤位遊戲同保育專家講座，涵蓋咗唔同嘅海洋生物主題，包括珊瑚、海洋哺乳類動物同螃蟹。呢啲活動會令公眾更加了解香港獨有嘅生物多樣性，同埋學習點樣尊重、愛護同欣賞香港嘅海洋野生動物。
圖文獲為食爸爸與Asher的親子日常授權轉載
其他閱讀：
免費參觀 T•Park 環境教育中心｜ 為食爸爸與Asher的親子日常
免費展覽 ｜ 大館 新常設展覽「 域多利監獄 B倉+D倉」 昔日囚服＋囚倉＋牆壁塗鴉 體會監倉生活｜ 為食爸爸與Asher的親子日常
