| 日期 | 全年適用 |
媽媽前日同豬仔包去開銅鑼灣，醒起有間冰室有紅色小巴打卡位同免費單車玩，於是就過去朝聖一下。豬仔包一去到冰室門口，已經急不及待衝去玩單車，冰室提供嘅單車有好多不同種類，有載人嘅單車，亦有需要家長一齊玩嘅人力車，不過最特別嘅係一架四人單車，圍住圈氹氹轉，唔使驚撞車，又可以同其他小朋友一齊玩，真係估唔到免費玩都咁多元化。
玩咗一陣，終於等到有紅色小巴卡位，我哋就急急腳去食午餐啦。小巴卡位有紅色嘅座位，旁邊有小巴車窗，亦有小巴牌可以影相，透過車窗望出去，其實風景係另一邊嘅食客，咁岩仲要係喺門口一齊玩嘅小朋友，豬仔包係咁同小朋友互相揮手，不過我哋呢邊就冇落車鈴，有點可惜。
冰室除咗有小巴打卡位之外，其他角落都有不同懷舊布置，不過冰室很多人，媽媽就冇每個角落去影相。
食物方面，同樣都有懷舊元素，我哋點咗「型男餐」，平時蕃茄湯會配米粉、通粉或者公仔麵，第一次見係配湯伊麵，相當特別。飲品媽媽就選了懷舊唂咕，另外再叫咗一杯「滾水蛋」俾豬仔包。「滾水蛋」嚟到嘅時候，豬仔包覺得好驚奇，第一次見到雞蛋喺水中嘅狀態，之後攪拌又有變化，喺透明杯度見到整個變化過程，好似做實驗咁。「滾水蛋」加了糖甜甜哋，豬仔包話好好飲，不過媽媽嘅唂咕佢就話有啲苦，都係朱古力好味啲。
最驚喜係塊多士，原先見寫係「芝士牛油扒多士」，意為係會有片芝士喺上面，但嚟到係同普通多士冇分別，不過食落係有好濃郁芝士味，正！媽媽食嘢期間，仲聽到話花市會延長營業時間，大家去銅鑼灣行完花市，都不妨試吓，門外有座位，可以邊食邊睇住小朋友玩架！
地址：銅鑼灣百德新街57號Fashion Walk地下C&D鋪
營業時間：7:30 – 21:45
電話：2868 0363
圖文獲「豬仔包の開心日常」授權轉載
更多親子好去處：
