| 日期 | 全年適用 |
溫泉酒店 ｜被譽為親子度假天花板的「小馬爾代夫」——廣州森林海溫泉度假酒店，真係靚到不得了！超級大，多嘢玩，一日都玩唔晒呀。
呢間五星級酒店是2020年開幕，好新淨。我哋入住嘅係別墅區·溫泉別墅雙床房，55平方米超級闊落，最愛乾淨木地板，而且張床褥瞓得幾舒服喎！房間內有露台，私人獨立溫泉有得玩水，小朋友勁開心呀。酒店免費提供BB床及床欄，帶住幼兒都好方便。
森林海溫泉度假酒店位於4A級風景名勝區，景觀真係靚到不得了，有瀑布、雲霧仙景。可以望到青山綠水山水畫咁靚嘅景，心情超級休閒！
我哋兩日一夜，真係唔夠時間玩……實在太多嘢玩，好大！大！大！
套票已經包曬酒店大部份遊樂設施任浸：2萬平方米「室外森林溫泉」、超過30款礦物溫泉池、無限次玩轉5萬平方米室內外水上樂園、超多滑梯、漂流河、大喇叭、水上過山車等等。13萬平方米天然礦物湖可以玩電動鴨仔船、划艇、餵錦鯉魚、直升機體驗，玩抓魚摸蝦一網撈起、萌寵樂園餵動物、VR魔幻森林等。仲有好多表演活動欣賞，我哋睇到「海上水飛人」超精彩！
套票包咗自助早餐、自助晚餐。五星級酒店質素都唔差，食物選擇非常多，粥粉麵飯、冰鎮海鮮、沙律前菜、壽司刺身、雪糕甜品飲品水果乜都有，大人細路都啱食！推介手拉香蕉薄餅、榴槤pizza、格仔窩夫、蒜香蒸蠔，仲有好特別有炸蟲蟲食。
另外我哋第一日午餐去咗食「特色農家菜」，就係酒店門口行幾分鐘就到。「客家小菜」大大碟好抵食，必食推介「竹筒飯」、古法燒雞、流沙包、品嚐地道風味，非常唔錯好食！
廣州森林海溫泉度假酒店
地址：廣州增城區派潭鎮白水寨 101 號
*兒童不加床免費入住！120cm以下免費早餐
*可另加購早餐、晚餐、樂園門票及車票
文章獲初初媽媽 ChochoMama授權轉載，優惠或不定期更新。
更多親子好去處：
