今次「WE嘩！充氣嘉年華」除咗不同種類嘅恐龍充氣彈床，仲加入咗考古學元素，好吸引呀！喜歡恐龍嘅晴晴，屋企啲恐龍玩具同書藉多到要搵個櫃擺放，簡直係不折不扣嘅恐龍迷！所以我哋又點會錯過「WE嘩！」嘅「恐龍遊樂園」呢？趁住假期，帶埋晴朗向青衣出發！仲未去「WE嘩！」嘅朋友，要把握時間喇！
熊啤啤方舟 身高限制：90 – 140cm
我哋晨咁早閘門都未開已經到達，「熊啤啤方舟」就係晴朗揀選嘅第一個遊戲喇！
大部份遊戲都設有身高限制，有啲仲會有重量限制添！所以玩之前記得要度一度先好去排隊呀！
「熊啤啤方舟」除咗有滑梯、彈床，底層仲有森林迷宮同障礙區，晴朗一入到去已經喪跳喪瀡，好快就進入咗忘我境界~
瀡極都未見晴晴嘅？原來佢覺得滑梯太高，淨係玩底層已經足夠喇喎！每人膽量唔同，玩得開心就得啦！