【大地在我腳下】BB級難度!! 17分鐘親子遊心經簡林
「心經簡林」~12年前第一次聽到這個名字， 因為當年熱愛行山的林Sir不時在課堂內投訴：「無端端戙38枝大木柱喺度，破壞大自然，神主牌咩，大煞風景。」
時光飛逝，一眨眼12年後的今天， 我竟然才真正第一次去見識這個山林。
我問魚子媽：「要行幾耐架?」 鐵子魚子媽答：「昂坪市集行去1.4km， 17分鐘就得。 不過你唔行山喎，都有興趣？」
一個零運動的人，今日去「行山」， 原因…我想見証一下當年林Sir嘅講法， 最重要「奇趣徑」簡單得連BB行都無問題呀！
SY好開心：「爸爸， 1.4km +1.4km，即係來回就可以孵2km精靈蛋囉…快D行囉。」
說罷我們便沿著大佛的右手邊「奇趣徑」直行， 路中心便有一頭懶懶的大公牛站在路中心任由途人拍照。
SY：「爸爸…唔好影啦， 好多烏蠅飛嚟飛去嘅!!」, (隻牛都嫌你嘈啦， 你又嫌棄人哋)。 於是我們繼續沿小徑向前走…
一幢似荒廢的宿舍就出現在右手邊…心想：「真係似拍鬼片，望入去會唔會見到龍婆坐搖搖椅呢?…驚驚！」
再直行兩邊都是樹蔭， 蟬鳴處處， SY：「爸爸，你唔好行咁快啦， 一齊行啦，我好驚呀！」(你唔好捉精靈咪可以行得快D囉)
之後我們沿山徑再向前走， 便已經是一個小草坪，有涼亭， 有長凳，數位叔叔姨姨坐在聊天， 右邊便是「心經簡林」，前方有「鳳凰觀日」的大牌坊，不時有登山人士由此步出來。
沒有想過， 如此簡單便走到「心經簡林」，全不運動的我也沒有半點氣喘， 難怪如此多晨運打扮的叔叔姨姨在簡林打躉。
38枝巨型大木樁，以「無限」的數學符號，圍著依山勢排列， 確實很有氣勢…
不過， 我又會想， 13年前，未有這38支大木樁的時候， 可以遠眺一望無際的大嶼山風景， 可能又是另一種舒暢喎！
短短17分鐘，便可以有大地在我腳下的感覺， 行程又如同平日逛信和差不多， 今日氣也不用喘，便可以心曠神怡地放空…正!正!正!正!正!正!正!正!正!
