| 日期 | 全年適用 |
聖誕節我哋一家大細住咗一間好出名、又正嘅 親子酒店 ——深圳觀瀾湖硬石酒店。預訂嘅「深圳硬石酒店住宿套餐」，包括2大2小嘅五星親子酒店住宿一晚、自助晚餐、自助早餐同親子烘焙活動，好豐富呀！
由於酒店好方便，我哋喺香港搭地鐵去到落馬洲過關，然後WeChat滴滴出行，唔使半個鐘就到觀瀾湖硬石酒店，早咗check-in，大堂安排棉花糖機同扭波波俾小朋友，好Baby Friendly。
我哋諗住放低行李去對面商場搵食，前台同事竟然upgrade我哋上貴賓室休息吓，貴賓室喺酒店嘅高層，可以睇到成個觀瀾湖嘅景觀，期間有下午茶、Cocktail任食任飲，食到飽飽等上房。Lisboy周圍跑，貴賓室嘅服務員陪佢玩得好開心！
喺貴賓室飲飽食醉之後終於有得上房，一入去好驚喜！
大灣區嘅酒店真係大得驚人，我哋入去見到一張大大嘅雙人床，房間面向住觀瀾湖嘅景觀，加上五星酒店嘅質素，夠晒乾淨，啱晒小朋友，仲有個大大嘅圓形浴缸！Lisboy即刻好興奮，嗱嗱聲幫手清潔浴缸，就喺呢個浴缸游返兩圈，好正嘅享受！
除咗房內大大個嘅圓形浴缸比Lisboy嬉水暢泳之外，呢個package仲包咗一個兒童烘焙活動，可以一家大細一齊整好好味嘅曲奇！所以今次嘅親子行程好豐富，好滿足！
酒店對面有MH Mall，入面都有大量親子、兒童玩樂設施，仲有VR遊戲設施俾大人玩，價錢仲好優惠添，我哋就玩咗好多次VR過山車，全身360度轉來轉去，場邊仲有好多香港朋友陪你一齊大叫，好過癮，平靚正！
呢個酒店套餐包咗早及晚兩餐自助餐，當日喺貴賓室任飲任食完，六點左右就落餐廳食自助晚餐。餐廳好大，有好多嘢食揀，咁啱聖誕節，仲有好多聖誕裝飾同甜品，好有聖誕氣氛，仲有Live Band。
呢度自助餐特別之處係紅、白同啤酒任飲，仲有大量汽水果汁俾大家揀；食物方面，我哋覺得比較特別嘅係有即燒焗生蠔、牛扒同刀切牛肉，好嫩滑。大量水果同甜品，估唔到食物種類同質素可以咁高，自助早餐種類亦都好多，真係好值得大家一試！
圖文獲「Lazy Li’s｜你是•李氏」授權轉載
其他好去處：
假日親子好去處 ｜荃灣新開 親子中心 室內遊樂場+打卡cafe+電影室+講故事時間
