| 日期 | 全年適用 |
搭升降機、坐車、沖涼、玩機動遊戲，最緊要安全又可靠！而呢方面規管就係機電工程署嘅工作，今次Blogger 80後爸B 就帶阿寶去「機電 ‧ 夢飛翔」展覽館，認識機電工程署兼邊玩邊學機電知識。
展覽館位於總部大樓地下大堂，主要介紹機電工程署嘅工作，一入去有年份燈泡做歷史回顧，仲有幅展示唔同場景嘅投影牆，有機場、油站、發電廠等等圖案，阿寶拍一拍相應圖案就會發光，即刻了解呢個部門嘅工作範疇。
另一邊就有其他互動裝置學機電知識，例如睇穿演講廳嘅「透視眼」屏幕，了解風、火、電、燈嘅機電設施。其他展品就學到能源效益、機電安全、氣體安全、可再生能源等等嘅知識。
阿寶最鍾意玩嘅跑步互動遊戲，可以憑機電知識控制螢幕角色攞分，佢跑咗幾次，盡情放電～
除咗地下大堂嘅展覽館，大樓天台仲有個3,000平方米觀景台，可以睇到超過2,000塊太陽能板，爸爸睇過啲相幾壯觀架！不過今次無預約無得睇，唯有下次…
離開大樓到外面都有其他嘢睇，例如有吉祥物機智啤啤可以打卡，亦有綠色建築設施，學習環保節能。
介紹返～呢度係 機電工程署總部大樓教育徑 ，可以免費參觀「機電 ‧ 夢飛翔」展覽館同埋戶外綠色建築設施，至於天台觀景台就要預約參觀，導覽活動通常喺星期五下晝舉行，詳情可以到機電工程署網站了解！
開放時間：星期一至五 09:30-16:30（公眾假期除外）
地址：九龍灣啟成街3號機電工程署總部大樓
交通：港鐵 – 啟德站A或D出口步行約15分鐘
巴士 – 途經啟福道/啟祥道/宏光道路線
免費入場
更多資訊：機電工程署網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
親子餐廳 ︱啟德簡約木系遊戲空間 盡情玩+食fusion中菜︱80後爸B
