經常帶阿寶周圍走嘅Blogger 80後爸B ，出行咁多交通工具就會揀鐵路，因為可以去勻18區夠晒方便！近期港鐵搞期間限定 鐵路展 ，最正嘅係真路軌上放咗真嘅退役列車，唔單止喺外面睇，仲可以走埋入去，當中有爸爸都搭過嘅「黃頭」列車，可以摸波波型扶手、坐橙色膠櫈，俾阿寶親身體驗，真係好特別！
另一架就係俗稱「烏蠅頭」嘅列車，坐吓而家唔會有嘅對頭單人座位，亦有得走入去坐頭等車卡，同場仲有一架「杜利華號」柴油機車，一樣好有歷史。
除咗有3架退役列車嘅實物，展覽仲有M-Train嘅真實車頭，可以睇到車軸、駕駛室，另外梗係唔少得港鐵周邊物品，阿寶喺標誌性「港鐵宋體」搵車站，再感受下車站嘅馬賽克建築，現場仲有其他列車部件、唔同時代信號燈、宣傳品、員工珍藏，同埋聽講就嚟退役嘅雷達鐘，無論係唔係鐵路迷都值得去朝聖！
介紹返～呢度係 「站見」 鐵路展 ，展覽喺紅磡站，邊條綫都好快去到，由7月開始仲增設平日時段，有5個場次可以參觀75分鐘，展開一次特別嘅鐵路之旅！
地址：紅磡暢運道8號紅磡站大堂
交通：港鐵紅磡站C1出口
開放時間：09:45、11:30、13:15、15:00、16:45（每場參觀75分鐘）
免費入場，按此了解更多
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
