| 日期 | 全年適用 |
消防員真係好受歡迎，每次消防嘉年華/開放日都好多人，Blogger 80後爸B 為咗畀阿寶認識佢哋嘅工作，早前就參觀咗 消防及救護教育中心暨博物館 。
呢座樓高4層嘅博物館，入口放咗一部70-80年代古董消防車，除咗老過爸爸媽媽，仲好有來頭架～唔單止出入火場，亦出現過喺片場，曾經參與電影《十萬火急》演出，不過拍攝完就畀人遺忘咗，最後得到博物館收留成為珍貴文物！
博物館地面嗰層，亦放咗幾部有歷史嘅消防車+救護車，以前救火救人，而家退休畀人欣賞。2樓3樓有啲消防制服、救火裝備等，介紹消防服務歷史及工作，亦有消防閘、滑落銅柱等模型，阿寶就鍾意同Q版任何仁公仔合照。
至於4樓就係介紹救護員嘅工作，原來救護車出動有好多裝備架！另外仲有999調派中心嘅介紹，同埋一個為紀念殉職消防員嘅英雄閣。呢層仲有大玻璃睇到消防員操練，聽講朝早時段可以睇到步操，不過今次我哋下晝參觀睇唔到。
介紹返～呢度係 消防及救護教育中心暨博物館 ，想參觀記得預約，平日無咁多人易book啲～另外呢度唔提供泊車位，要搵定來回程嘅交通呀！
開放時間：星期一、二、四至日 09:30-17:30
(有4個時段，每個時段1.5小時)
星期三休館
地址：將軍澳百勝角路11號
交通：港鐵坑口站轉九巴298E/F
港鐵將軍澳站轉小巴116
城巴793 部分班次
免費入場，按此預約
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
親子好去處｜ 小白兔音樂農莊 可以餵小動物兼多嘢玩｜80後爸B
室內遊樂場 ｜免費海洋世界遊戲室 大大架潛水艇／海底洞穴繩網／滑梯｜80後爸B
