日本親子遊 |一家四口自駕遊四國 19日行程全公開(上)


全年適用

日本親子遊 |首先,分享下點解會選四國。疫情前,兩個仔去過兩次九州(仍然覺得趁細個就要帶佢哋去旅行,唔係你話想去就有得去),小朋友仲細,必定全程自駕;我哋鐘情鄉下地方,鍾意無乜人,輕輕鬆鬆。

著數優惠

 

學校 / 校長專訪

日本親子遊 |Day 1

活躍公晨早車我哋去機場,得Hkexpress有機去高松,帶定少量玩具、圖書,又瞓一陣,3個幾鐘機好輕易完成。拎完行李一出,就見到平成租車公司嘅counter,好快拎完車,去family mart買啲飲品和食物就出發去公園。(*比較過不同租車公司,因為我哋去19日,平成有月租plan, 相對比較抵。)

Day1唯一活動——峰山公園。竟然喺山上見到同樣去公園玩嘅香港人。峰山公園有超長滑梯,我哋一家四口都一齊玩,又有飛索,兩個仔超愛!玩完就行上展望台睇日落。

日本親子遊 |Day 2

喺酒店食完早餐就出發去宇多津町嘅四國水族館。號稱四國最大級水族館,確實都係好新,不過我哋覺得無乜體驗,例如小朋友無得餵魚。午餐喺水族館食,兒童餐非常吸引。

下午就去咗對面play park玩,室內,地方大,大人1,000yen,小朋友1,500yen,好抵玩,是天氣熱/雨天不錯的選擇!內裏有沙池、彈床等,我啲仔玩得好開心。

*如果打算會去埋play park,就記得泊喺play park個邊。因為play park有免費泊車。如果淨係去水族館個邊泊車,就要俾600yen。

日本親子遊 |Day 3

全日都留喺New Reoma World玩。New Reoma World是四國最大的主題樂園,亦是一個完全不用排隊的樂園,非常啱我兩個仔呢個年紀嘅小朋友玩。

駕車我兩個仔玩咗無數次,大仔仲可以自己一個駕。有個playroom位置好好玩,裝修好逼真,有部真嘅收銀機,小朋友扮收銀㩒完,真係有收據出!

本身入場費已經非常相宜,一家四口都唔洗一千蚊港幣,玩足全日。無意中比我發現喺Lawson嘅機買入場券會平啲,駕車一定會經Lawson,入場之前買定,一家四口共慳咗1,200yen。

日本親子遊 |Day 4

又去返高松機場附近玩讚歧兒童王國。我哋首先就去咗玩付費項目:玩車!全部都係變種單車,小朋友任玩300分鐘先係100yen,抵到不得了。兩個仔當然喺30分鐘內不斷換車。由於喺跑道旁邊,一路踩,一路仲會見到飛機升降,雖然熱到不得了,不過真係好好玩。

玩完好熱嘅露天踩車,就去室內玩下。室內都好多嘢玩,又有美術工房、科學工房等,我哋又比咗錢去睇30分鐘日文卡通片。室外有啲攀爬設施,我哋行到公園最側邊飛機及日本電車位置,小朋友可以上飛機同電車的駕駛座,模擬機師和車長,幾過癮。

之後再去附近嘅滑草場滑草。可能太熱,淨係得我哋一家人玩,310yen借用滑草兜滑一個鐘。

日本親子遊|Day 5

首站: 高松市兒童未來館

*停車場車票喺未來館過一過機,有免費1小時。

周圍參觀下,有啲地震情況展示、昆蟲標本等,有個小小的室內playroom,免費,比較適合小B。

第2站: 栗林公園

之後去栗林公園坐和船,可以早一日預約定。船程大約半小時,去到掬月亭有得買魚糧餵魚。栗林公園真係好靚好靚!

預約網站按此

【乘船料】

●大人:一人1回620円

●小人(中学生以下):一人1回310円

第3站: 中野烏冬學校

之後就去中野烏冬學校(高松校)學整烏冬。預先上網book定(預約網站)可以自己碌、切、踩,仲會播音樂,鼓勵大家落力啲,成個氣氛幾好。整完,仲可以上飯堂自煮即食,味道唔錯,仲可以額外叫其他食物。連整同食,大約90分鐘內,玩完仲有麵粉棍送,每人都只係1,600yen,真係超值!

日本親子遊|Day 6

第1站: 道の駅ふれあいパークみの

由高松前往新居濱途中會經過。竟然喺高速中途都會有個咁大型既公園,雖然比較舊,但真係好玩,仲可以比錢坐車,圍住坐一個圈,小朋友300yen。

第2站: Saijo Blueberry Orchards 西条ブルーベリー農園

非常推介的農莊!

我哋去嘅時間只有藍莓摘。園主叔叔非常友善,我哋完全唔識日文,佢就用簡單英文和google translate同我哋溝通。農園內有很多不同品種的藍莓,越大粒越甜。細佬因為個子較矮小,所以成日摘到好大粒又好甜嘅藍莓。叔叔除咗種藍莓,仲有養蜜蜂,介紹我哋滴一滴蜜糖落藍莓上面食,又帶我哋睇蜜蜂。

第3站: 愛媛縣綜合科學博物館

館內好大,亦唔多人,相對於高松市兒童未來館,我覺得愛媛縣綜合科學博物館更值得去。去既時候咁啱有昆蟲展,小朋友可以自己摸獨角仙,勁開心。

日本親子遊|Day 7

第1站: 別子銅山

礦場遺址建成的,環境優美。初時只係見到部好靚嘅觀光小火車,覺得啲仔有得坐住睇風景應該會幾開心,5分鐘車程,確實係幾有趣。

之後就入礦坑行,室外溫度大概32度,室內只係18.8度。意想不到,裏面竟然有個兒童遊樂區!佢哋坐咗幾次吊車,之後仲體驗埋淘砂金、打銅。別子銅山其實仲有室內playroom,不過見好似比較適合細個啲嘅小朋友(2-4歲),所以就無入去玩了。總括,幾值得帶小朋友去玩。

中途我哋去咗買炸雞食。係我哋食過最好食嘅炸雞,皮脆、肉嫩、多汁,如果去新居濱,必食!

元祖 驢馬(ろば) 本店:9-1932 Miyabaracho, Niihama, Ehime 792-0833日本

第2站: Takinomiya Park 滝の宮公園

地址:〒792-0034 愛媛県新居浜市滝の宮町8−1

非常值得去嘅公園,好新淨,又好好玩,有個企喺度玩既鞦韆,好刺激。

日本親子遊|Day 8

第1站: Railway History Park in SAIJO 鉄道歴史パークSAIJO(四国鐵道文化館・十河信二記念館)

地址:〒793-0030 愛媛県西条市大町798-1

有2個仔,鐵道館一定係不二之選,參觀下火車,環境都好靚。

第2站: Marutomo Seafood Market マルトモ水産

地址:〒793-0043 愛媛県西条市樋之口456-5

去漁市場食午餐,好多日本人去食,都等咗一陣先有位。我哋食刺身、海膽就普普通通,反而啲仔既炸大蝦定食好味。啲大蝦真係好大,大到龍蝦咁。喺等緊既期間,我哋就坐喺碼頭邊望下海景,超靚的。

第3站: 丹原綜合公園

地址:〒791-0504 愛媛県西条市丹原町久妙寺甲244

絶對好玩嘅公園,可以選擇行斜路上公園/爬繩網上公園。上到公園,有一個日本小妹妹玩緊,喺言語不通情況下,小朋友都可以一齊玩。我同日本媽媽都用google translate溝通咗幾句,佢都話呢個公園喺呢區來說好好玩。除咗滑梯、繩網,竟然仲有波波池!

日本親子遊 |Day 9

離開新居濱,向東溫、松山出發。

第1站: 東温市総合公園

地址:〒791-0205 愛媛県東温市西岡1284-1

泊停咗車,要行大概10分鐘先到玩樂點。

午餐@Tentenmaru Shigenobuten 天天丸 重信店

地址:〒791-0216 愛媛県東温市野田3丁目6−4

幾高質嘅迴轉壽司店,經開嘅可以一試,佢個玉子燒做得好好,Jacob食咗4-5碟。

第2站: 松山総合公園

地址:〒791-8024 愛媛県松山市朝日ヶ丘1丁目 外15

同啲仔玩完,就行咗一段時間行到上古堡位置。天氣熱行山,真係好辛苦,雖然上到去,都幾靚。一日玩2個公園真係夠晒皮。之後返到松山市,周圍行下,睇吓橙色嘅松山市電車,啲仔好恨搭。

日本親子遊|Day 10

第1站: 愛媛縣立砥部動物園

地址:〒791-2191 愛媛県伊予郡砥部町上原町240

幾大,值得一去嘅動物園,有好多唔同嘅動物,包括長頸鹿、大象,仲可以比300yen買魚餵海獅。午餐我哋留咗喺動物園內嘅餐廳食,景觀一流,可以睇住動物食,可惜,真係唔係幾好味。

第2站: Higashi-Dogo Sora to Mori Onsen

地址:〒790-0924 愛媛県松山市南久米町3-1

疫情前帶仔去過2次日本,都有浸溫泉,不過當時佢哋仲細,都唔係好享受到。今次都諗究竟住唔住溫泉旅館,最後覺得道後溫泉咁出名,都係要去浸下,就搵間房內有得浸既溫泉旅館+一泊二食。

呢間溫泉旅館真係唔錯,因為房內有個都幾大嘅溫泉,可以夜晚浸完,第二朝又浸。如果唔一泊二食,餐廳都有其他食物可以叫,又有兒童餐,價錢都非常相宜。

圖文獲「有個過度活躍媽」授權轉載

更多親子好去處:

珠海親子遊 2日1夜超抵玩套餐 酒店套票包遊樂場+動物園+溫泉 一家四口入住1,500蚊有找

澳門親子遊 |5大放電 公園 推介 免費碰碰車/3層樓高滑梯/特大沙池/飛索/兒童電動車只需葡幣$5/15分鐘

名古屋Legoland 遊玩全攻略 6小時玩盡20多個設施


熱門文章

召集親子餅印照片.展示最強DNA | 入選100強即獲精彩禮品
媽媽谷 | 免費加入Ohpama WhatsApp group獲得最新資訊 著數優惠
復活節海外玩2024|17大復活節好去處 日韓賞櫻/大阪環球影城復活節慶典限定/特色室內遊樂場
運動嘉年華 3月限定免費入場 5大運動體驗區 +近距離接觸香港運動員+免費換領紀念品
送《劇場版 角落小夥伴 奇幻的玩具工廠》電影換票證 | 展開奇幻探險之旅

暑假親子遊 | 盤點20大暑假旅遊熱點 享受真正Family Time
深圳滑雪場 ︱卡魯冰雪世界 5折快閃 $85/位 包雪服+雪靴 2小時暢玩滑雪+滑冰
日本親子遊 |一家四口自駕遊四國 19日行程全公開(下)
珠海親子酒店 |高性價比鴨仔主題房 近拱北口岸 有免費playhouse
澳門 新濠影匯水上樂園 門票「買一送一」平均$260/位 另有Tyson Yoshi一同開Party+⁠2小時無限暢飲+園內餐飲8折 低至$350/位
日本親子遊 | 名古屋港水族館 全日本最大戶外水族箱 過100種海洋生物 必睇殺人鯨/虎鯨表演
查看更多   ▸