| 日期 | 全年適用 |
全港最高建築物ICC有484米，Blogger 80後爸B 早排就同阿寶去呢度嘅100樓睇風景，咁高地方望嘅嘢通通都變得好細粒。 親子好去處
仲未上去，地下入口已經幾多嘢睇，有立體投影+回憶長廊，展示香港過去嘅轉變同發展，穿過時光隧道影吓相，再搭全港速度最快嘅升降機，60秒就上到100樓，真係好快～頂嘅屏幕仲有藍天白雲影像，真係好似飛緊上天空！
出咗升降機有條透明玻璃通道，下面係即將睇到嘅建築物立體模型，再走出去觀景台，景色真係好壯觀。玻璃窗前有展板講解眼前係邊度邊度，可以同阿寶上地理課，呢度亦貼心註明最佳觀賞位置，睇風景影靚相最perfect！
我哋圍繞觀景台360°走一圈，東南西北嘅風景都可以睇得到，呢日天氣望到港九新界好多地方，聽講最遠可以睇到澳門，不過今次睇唔到。
除咗睇風景，場內仲有介紹香港嘅互動展板，講吓街道歷史，飲食、傳統文化等，另外有關世界最高大廈嘅介紹，阿寶揭一揭睇一睇，又有嘢學到。呢度仲有立體畫同特色裝置可以打卡，想chill啲可以嘆埋酒店主理嘅下午茶。
我哋由下晝留到日落時間，唔單止睇到靚靚嘅夕陽，仲可以睇埋夜景先走。
介紹返～呢度係 天際100 香港觀景台 ，除咗可以360°睇到香港景色，喺咁高嘅地方睇煙花表演一樣咁正，呢度除夕夜有「跨年倒數派對」，企喺393米高空迎接新一年，下年一定步步高陞！
開放時間：每日10:00-20:30
地址：西九龍環球貿易廣場100樓
交通：港鐵九龍站
入場費：$99起（香港居民半價優惠）
更多資訊：「天際100 香港觀景台」網站
天際100 香港觀景台
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
免費遊樂場 ｜ 沙田恐龍公園 無限時任玩 入場6大注意位｜80後爸B
室內遊樂場 ｜免費海洋世界遊戲室 大大架潛水艇／海底洞穴繩網／滑梯｜80後爸B
