| 日期 | 全年適用 |
香港科學館 咁多嘢玩真係好吸引，當中3樓「兒童天地」更係阿寶至愛，呢度嘅展品可以俾佢發揮想像力，親身體驗科學嘅樂趣！
咁多展品阿寶最鍾意「小小工程師」，將磚頭由輸送帶搬到車仔運走，再用起重機吊到工地2樓，模擬做地盤妹起樓。起完樓，阿寶就到「迷你車房」整車，除咗可以坐喺車入面，仲可以拆轆、開引擎蓋檢查，盡情將架車「破壞」。
另一個叫「滾球過山車」嘅展品，阿寶需要落手落腳自製軌道，務求令個波轉多啲彎、打多啲關斗，完全發揮trial and error嘅科學精神。
其實科學館仲有好多展區，可以睇恐龍等絕種動植物，感受地震、颱風嘅威力，睇蝴蝶標本、嘗試觸電感覺…真係玩足一日都唔夠時間！
介紹返～呢度係 香港科學館 ，留意「小小工程師」有人數限制，所以記得攞咗籌先去玩其他嘢！另外，以下呢啲情況科學館免費入場：4歲以下、全日制學生、逢星期三，而且入場無限時，啱晒小朋友消磨時間！
開放時間：星期一至三及五10:00-19:00
星期六、日及公眾假期10:00-21:00
星期四（假期除外）、年初一及二休館
聖誕前夕、農曆新年除夕開放至17:00
地址：尖沙咀科學館道2號
交通：港鐵尖東站/尖沙咀站P2出口
港鐵紅磡站D1出口
巴士香港科學館站
入場費：標準票$20，優惠票$10
4歲以下、全日制學生、星期三免費
更多資訊：「香港科學館」網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
親子好去處 ｜100層高觀景台 香港人半價優惠$99/位｜80後爸B
