| 日期 | 全年適用 |
親子餐廳 小朋友有得玩，爸爸媽媽有得食，今次Blogger 80後爸B 帶阿寶去呢間餐廳以簡約木系風格設計，無論係室內環境佈置，定係廚房玩具、滑梯、攀爬架，主打都係以木製，自然用料+和諧用色，爸爸至鍾意！
阿寶鍾意玩波波池，又鍾意玩買餸煮飯仔，仲有車仔、跳彈床、角色扮演服裝，同埋放有唔同玩具嘅七彩小屋，場地亦有個樓梯閱讀區可以睇吓書，或者開party做影相台階都得！
雖然地方唔太大，但玩嘅種類多元化，阿寶想周圍郁下定靜靜地玩，同樣咁啱佢！
餐廳將用餐區、玩樂區融合一齊，爸爸媽媽坐喺度都方便望到小朋友，至於食物方面提供fusion中菜，例如超凡黑松露炒飯、創意牛柳年糕，鍾意食辣嘅有酸菜魚、宮保雞丁，兒童餐都係中式餸菜，而且定期更換新菜式，保持新鮮感。
介紹返～呢度係 Origami Kids Cafe紙飛機親子空間 ，位於啟德郵輪碼頭平台，除咗可以喺室內食嘢同玩，亦可以到戶外公園草地野餐，仲可以欣賞維港海景。不過郵輪碼頭始終有啲隔涉，記得嚟之前要預約，以免被包場而摸門釘！
營業時間：平日 11:15-20:00、假日 10:00-21:00（有唔同時段）
地址：九龍灣承豐道33號啟德郵輪碼頭B區北面平台N305舖
交通：城巴20A/20R/22/22M/22R、九巴5R、小巴86
更多資訊：fb「Origami Kids Cafe 紙飛機親子餐廳」
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
室內遊樂場 ︱奇妙水世界遊戲室 「水底」潛望鏡／大海星軟墊／殺人鯨滑梯︱80後爸B
室內遊樂場 ︱動物王國主題遊戲室 透明滑梯／障礙攀爬架／動物圖案布置︱80後爸B
