| 日期 | 全年適用 |
而家啲公園真係好好玩，Blogger 80後爸B 早前帶阿寶去玩呢個以「好玩自然」為概念嘅遊樂場，設計用咗5個大自然元素，即陽光、天空、空氣、大地及水，滲透75組遊樂體驗設施，阿寶一邊玩一邊連繫大自然，玩足大半日都仲未玩夠！
爸爸最欣賞公園利用咗原有建築物，設計唔同高低層次嘅園景平台，再喺樓梯旁邊整幾條攀爬牆+瀡滑梯。而全場最大嘅障礙繩網攀爬架，繩網夠晒高，滑梯又夠刺激。
唔同自然元素概念嘅設施都好吸引，例如渠管迷宮、小型樹屋、風車、回音洞、音樂敲擊管、彩虹隧道等，水嘅元素仲有親水設施，夏天咁熱玩水一流！
介紹返～呢度係 茶果嶺海濱公園 ，望到啟德郵輪碼頭，甚至維港海景，日落夜景煙花都睇到。不過公園環境比較開揚，而且曬成日嘅金屬滑梯熱到辣屁股，下晝晏啲時間嚟玩會好啲，平日去亦少啲人，唔使點排隊有得玩。
開放時間：每日 07:00-23:00（親水設施：08:00-20:00）
地址：觀塘偉業街
交通：港鐵（觀塘B1出口、藍田D1出口）、觀塘碼頭步行約5分鐘
免費入場
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
