| 日期 | 全年適用 |
全新 Kiztopia太空主題店 最近開業，早排Blogger 80後爸B 帶阿寶去試玩，呢度號稱係全港最大嘅分店，真係玩足2個鐘都未捨得走！
講到最好玩又最鍾意玩，阿寶首選一定係超巨型攀爬區，唔單止夠晒大，滑梯都已經有3條，有條要坐橡皮艇瀡嘅8.5m長滑梯，爸爸睇到都覺得刺激，好想玩埋一份。
另一條係涼浸浸嘅不銹鋼滑梯，喺最高瀡落去火山溶岩波波池，有一種冷熱交融嘅感覺～攀爬區除咗滑梯，仲有各種障礙遊戲，好似mirror 走廊、幾米高嘅繩網，亦有用腳踩、用手打嘅音樂裝置，啱晒訓練阿寶嘅音樂感。
玩完攀爬區就玩啲科技互動嘅遊戲區，唔只係對住個mon打機，而係繼續郁手郁腳盡情放電，阿寶對住感應龍門踢波，轉頭就碌健身球操控虛擬角色，再喺彈床區一邊跳一邊向投影射波，仲可以將成個身體痴上牆，睇到都覺得好玩！
咁大個場，爸爸只係陪玩已經好攰，雖然阿寶有得玩啲精力用極都仲有，但係都錫住爸爸，玩啲靜態嘅嘢，畀爸爸唞一唞～呢度嘅職業體驗區域有5個咁多，阿寶喺趣味農場執母雞生嘅蛋，又幫手收割農田嘅農作物，或者喺動物診所治療小動物，再到衣帽間化個靚妝做公主，消磨到唔少時間！
呢度仲有迷你彈床城堡，為幼童而設嘅迷你障礙場地，巨型積木遊戲牆、木粒池等等，啱晒唔同年紀唔同性格嘅小朋友放電。
介紹返～呢度係 Kiztopia兒童室內遊樂場 足足有13,000呎咁大，有19個動靜遊樂設施，每樣都玩，應該大半日先玩得晒！
開放時間：每日 10:00-20:00
地址：將軍澳唐德街9號將軍澳中心G35
交通：港鐵將軍澳站B出口
入場費：60分鐘$158起，120分鐘$228起
更多資訊：fb「Kiztopia Hong Kong」
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
